پرون په کابل کې څو ښځو لاریون وکړ او د امربالمعروف او نهی عن المنکر وزارت د هغه توصیې پر ضد یې غږ پورته کړ چې پکې له ښځو غوښتل شوي وو چې شرعي حجاب مراعات کړي. دغو ښځو نه یوازې دا چې د حجاب پر ضد شعارونه ورکول، بلکې د ښځو چادري ته یې اور واچاوه. دوی په خپلو شعارونو کې وویل چې دا د ښځو خوښه ده چې څه ډول غواړي، هغسې ګرځېدلی شي او اسلامي امارت پر دوی حجاب نه شي اجباري کولی.
د نورو ټولو لاریونونو پر خلاف دغه لاریون ته د خلکو غبرګون ډېر توند او تېز و. خلک وايي چې هر څوک د اعتراض او لاریون حق لري، خو هېڅوک نه شي کولی چې منل شوو ارزښتونو، جامو او حجاب ته سپکاوی وکړي. چادري ته سپکاوی چې په افغانستان کې د ډېرو ښځو له خوا په خپله خوښه اغوستل کېږي، په واقعیت کې د افغانستان ښځو ته سپکاوی دی. که څوک خپله چادري نه اغوندي، خپله خوښه یې ده، خو څنګه ځان ته اجازه ورکوي چې د نورو له خوا کارول کېدونکو جامو ته سپکاوی وکړي!؟ د حجاب سپکاوی او پر ضد یې شعارونه ورکول په واقعیت کې د اسلامي او افغاني ارزښتونو سپکاوی او پر ضد یې شعار ورکول دي. دا کار یوازې پردۍ، له خپلو ارزښتونو او فرهنګ لرې او پروژهیي ښځې کولی شي. په دې لاریون سره دا د ګوتو په شمېر نامعلومې ښځې ښيي چې دوی د افغانستان له خلکو، ارزښتونو، دین او فرهنګ سره په څومره ژوره دښمنۍ کې دي. د دوی پرونی لاریون د اسلامي امارت خلاف لاریون نه و، بلکې دا د اسلام، اسلامي او افغاني ارزښتونو او فرهنګ خلاف لاریون و چې په هېڅ ډول د توجینه وړ نه دی.
واک ته د اسلامي امارت له رسېدو وروسته یوازې یو څو ښځې دي چې منظم لاریونونه کوي. ویل کېږي چې دا یوه ډله ښځې دي او د کابل په بېلابېلو ځایونو کې په مختلفو نومونو لاریونونه کوي. دغو ښځو ته نه یوازې له بهره ډېرې پیسې راځي، بلکې پلانونه هم له بهره ورکول کېږي او دوی یې عملي کوي.
پر اسلامي امارت تل دا نیوکې وي چې د اعتراضونو پر وړاندې نرمي نه ښيي، خو د پرون لاریون له کبله پرې دا نیوکه ده چې ولې یې نرمې کړې ده او ولې یې دغه ډول لاریون ته اجازه ورکړې ده. پرونیو لاریونوالو ټولې سرې کرښې ماتې کړي دي، د افغانستان میلیونونه وګړي یې ځورولي دي او آن د اسلامي امارت په دننه کې یې پر چارواکو اعتراضونه او نیوکې پیدا کړې دي. اسلامي امارت دې خپل مصلحتونه کوي، خو په دې چاره کې یې مصلحت سخت زیان لري. که ددغو پروژهيي کړیو سره غوڅ او پرېکنده چلند ونه شي، نو زیان یې تر هغه مصلحت ډېر دی چې اسلامي امارت ورته پام کوي.
اسلامي امارت باید د لاریونونو او اعتراضونو په اړه لا زیات واضح دریځ ونیسي. هر څوک حق لري چې لاریون وکړي او باید دا حق ورکړل شي. هر څوک کولی چې د چارواکو پر کړنو او تګلارو نیوکې وکړي، خو هېڅوک باید اجازه ونه لري چې زموږ د ارزښتونو پر ضد لاریون وکړي او سپکاوي یې وکړي. هېڅوک نه شي کولی چې د اسلامي احکامو پر ضد ودرېږي او هېڅوک نه شي کولی چې زموږ سرې کرښې ماتې کړي. له همدې امله پکار ده چې اسلامي امارت ددغه ډول حرکتونو مخه ونیسي چې زموږ د ارزښتونو سپکاوی کوي او بهرنۍ ناوړه پروژې پلې کوي.
