د زلمي خلیلزاد په مشرۍ د متحده ایالتونو د سولې پلاوي د پاکستان د بهرنیو چارو وزیر او نورو چارواکو سره لیده کاته کړي او د طالبانو پلاوی له خپل مشر ملا هبت الله اخوند او پاکستاني چارواکو سره د راتلونکو خبرو اترو لپاره د مشورې په هدف دغه هېواد ته تللی دی.
د طالبانو د پلاوي مشري شېرمحمد عباس ستانکزی کوي چې شهاب الدین دلاور، ضیاء الرحمن مدني او عبدالسلام حنفي پکې شامل دي.
زلمی خلیلزاد د اتو هېوادونو په اتلس ورځني سفر راوتلی او له افغان چارواکو او سیاسي مشرانو سره تر لیده کاته وروسته به روسیې، ازبکستان، ترکمنستان، بلجیم او قطر ته سفر کوي.
د زلمي خلیلزاد په مشرۍ د امریکا د سولې پلاوی د سه شنبې په ورځ له دوبۍ نه اسلام اباد ته تللی او د دغه هېواد د بهرنیو چارو له وزیر او نورو ملکي او پوځي چارواکو سره یې کتلي دي. خلیلزاد پر پاکستان سربېره، افغانستان، روسیې، ازبکستان، ترکمنستان، بلجیم او متحده عرب اماراتو او قطر ته هم یو اتلس ورځنی سفر لري چې له ولسمشر غني، اجرایه رییس ډاکټر عبدالله او پخواني ولسمشر حامد کرزي سره به د سولې پر خبرو سلا مشورې وکړي او په بلجیم کې به د ناټو له مشرانو سره هم وګوري.
د خلیلزاد له سفر سره هممهاله د شېرمحمد ستانکزي په مشرۍ د طالبانو یو پلاوی هم د پاکستان په سفر بوخت دی.
د طالبانو د قطر دفتر یوه غړي ټلګراف ته ویلي، دغه پلاوی د ملا هبت الله په غوښتنه دغه هېواد ته تللی او د راتلونکي پړاو خبرو اترو په هکله به د دې ډلې له مشرتابه سره خبرې اترې کوي، خو بي بي سي بیا د کوټې شورا د یوه غړي په حواله ویلي چې پاکستان د افغان سولې خبرو روان بهیر ته د ځان ور ګډولو لپاره دا کسان وربللي دي. دغه طالب چارواکي زیاته کړې چې پاکستان فکر کوي، په دې خبرو کې د پاکستان حکومت هم د افغان حکومت په څېر څنډې ته شوی دی.
ټلګراف ته بیا د قطر دفتر یو غړي ویلي: «موږ له خپلو مشرانو سره د سولې اړوند مسایل ټکي پر ټکي شریکوو او په دې توګه به پرمخ ځو. له خلیلزاد سره په راتلونکې ناسته کې به موږ په مختلفو موضوعاتو کې د خپل مشرتابه مشورې ترلاسه کړو. ډېر د اختلاف ټکي شته، خو ښه خبره داده چې موږ خبرې کوو او جاري به یې ساتو.»
طالب ویاند زبیح الله مجاهد بیا دا سفر نه تایید کړی او نه یې هم رد کړی دی. نوموړي ویلي: «معلومات کوم، دویم دا چې د طالبانو مشران په هېواد کې دي او نه پاکستان کې، له دې ځایه له مشرانو سره سلا مشورې کولی شي».
د امریکا ولسمشر ډونالډ ټرمپ د پاکستان صدراعظم ته په یوه استولي لیک کې د افغان سولې په برخه کې د نوموړي د همکارۍ غوښتنه کړې ده.
د شنونکو په باور، سره له دې چې ټرمپ له دې وړاندې پر پاکستان د افغان سولې په برخه کې د نه همکارۍ له امله سختې نیوکې کړې وې، دغه تازه دریځ یې اسلام اباد ته یو ځل بیا د امتیاز ورکولو په معنا دی.
دا څرګندونې داسې مهال دي چې د امریکا ولسمشر ډونالډ ټرمپ د پاکستان صدراعظم ته په یوه استولي لیک کې د افغان سولې په برخه کې د نوموړي د همکارۍ غوښتنه کړې ده، خو شنونکي وايي چې د امریکا ولسمشر تر دې مخکې پر پاکستان له دې امله نیوکې کړې چې د افغان سولې په برخه کې همکاري نه کوي، خو دغه تازه دریځ یې اسلام اباد ته د امتیاز ورکولو معنی لري.
