په کابل او کندهار کې په تېرو څو ورځو کې دوې داسې پېښې وشوې چې زموږ هېوادوالو ته پکې مرګژوبله واوښته او خلک یې هم اندېښمن کړل. په کابل کې د غاښو یو ډاکټر هغه مهال ووژل شو چې یوې تالاشۍ ته ونه درېد. له دې پېښې وروسته پرون په کندهار کې بیا یوه ښځه په همداسې یوه پېښه کې ووژل شوه او بله ټپي شوه. په دواړو پېښو کې لامل دا یاد شوی چې موټر تالاشۍ ته نه دی درېدلی او کله چې له تالاشۍ تېر شوی، نو د اسلامي امارت د ځواکونو له خوا تر برید لاندې راغلی دی.
دا ډول پېښې خواشینوونکې دي او ښيي چې امنیتي ځواکونه له خلکو سره مسوولانه او مسلکي چلند ته لا هم زیات واټن لري. له همدې امله اړتیا ده چې د امنیتي ځواکونو د روزنې لپاره لا زیات کار وشي. په تالاشیو کې نه درېدل ددې مانا نه لري چې دا سړی حتمي مجرم دی، ځکه کله د یو چا د درېدو اشارې ته پام نه شي، کله هم د امنیتي ځواکونو اشارې مسلکي نه وي او موټر چلوونکی نه پوهېږي چې دا د درېدو او که د تېرېدو اشاره ده. ددې تر څنګ کله د سړک څنګ ته وسله وال کسان ولاړ وي او شخصي جامې یې اغوستي وي، په سیمه کې نه د تالاشۍ کومه نښه وي او نه هم د امنیتي ځواکونو کوم موټر ولاړ وي چې څوک پوه شي چې دا تالاشي ده، نو ځکه موټر چلوونکي ترې تېر شي. کله داسې هم وي چې موټر چلوونکی ناروغ ولري او بېړه ولري او یا هم کومه بله ستونزه ولري او پام یې نه وي او له تالاشۍ تېر شي. په داسې حالتونو کې د موټروان ګرم ګڼل سم نه دي، دا خو لا لرې ده چې پرې ډزې وشي او ووژل شي. ښايي ډېر وخت موټر چلوونکی ملامت وي، غل وي او یا هم بل مجرم وي او د تېښتې هڅه کوي، بیا هم پر هغه د مخامخ ډزو او د هغه د وژلو جواز نشته.
کورنیو چارو وزارت او نور اړوند اورګانونه باید خپلو امنیتي کسانو ته ور زده کړي چې مسلکي تالاشي وکړي، د تالاشۍ ځای یې مناسب وي، یونیفورم ولري، په سیمه کې د تالاشۍ نښې ولګوي، د درېدو او تلو واضح اشارې وکړلی شي. له هغه وروسته که کوم موټر چلوونکی تالاشۍ ته ونه درېده، باید موټر یې تعقیب شي، پیدا شي او بیا ورسره قانوني چلند وشي. که حالت بېړنی وي او امنیتي ځواکونه ډاډمن وي چې دا کس مجرم دی، باید هوايي ډزې پسې وشي او آن که سخته اړتیا وي، نو د موټر په ټایرونو دې ډزې وشي. له دې پرته پر موټر چلوونکي او یا په موټر کې پر ناستو سپرلیو مخامخ ډزې په هېڅ ډول سم او د توجیه وړ کار نه دی. په وروستۍ پېښه کې خو زموږ یوه خور شهیده شوې او بله ټپي شوې چې دا د نامسلکي او بې پروا چلند ښکاره مثال دی. تر دې وړاندې پېښو کې هم ښځو او نورو بې ګناه وګړو ته مرګژوبله اوښتې وه.
پکار ده چې نور ددغه ډول پېښو مخه ونیول شي، د انسان ژوند جدي وګڼل شي، امنیتي ځواکونه مسلکي شي، یونیفورم ولري او ورته وښودل شي چې په هر حالت کې د ډزو حق نه لري او په خاصو وختونو کې دوی ډز کولی شي. امنیتي ځواکونه باید پوه شي چې دوی آن د مجرم د وژلو حق هم نه لري، بلکې دوی مسوول دي چې مجرمین ونیسي او د قانون منګولو ته یې وسپاري.
