ډنفورډ: امریکا باید د خپل امنیت په موخه افغانستان کې پاتې شي

د متحده ایالاتو یو لوړپوړی نظامي جنرال جوزف ډنفورډ وایي امریکا باید د خپل امنیت په موخه افغانستان کې نظامي حضور ته دوام ورکړي. نوموړي ویلي که چېرې امریکا غواړي بیا د سپټمبر ۱۱مې په څېر پېښو سره مخ نه شي نو باید په دې هېواد کې خپل نظامي حضور پای ته ونه رسوي. هغه دا څرګندونې د جمعې په ورځ له واشنګټن پوسټ ورځپاڼې سره به خبرو کې کړې دي. نوموړي زیاته کړې له افغانستانه د بهرنیو ځواکونو وتل نه د افغانستان، نه د سیمې او نه هم د امریکا په ګټه دي نو باید په پوره تدبیر او هوښیارۍ ګامونه واخیستل شي. ډنفورډ د خپلو خبرو پر دوام زیاته کړې که چېرته امریکا له افغانستانه ووځي دا هېواد به یو ځل بیا د ترهګرو لپاره په امن ځای بدل او نړیوال امنیت به وګواښي. دا په داسې حال کې ده چې امریکا غواړي په افغانستان کې خپله تر ټولو اوږده جګړه پای ته ورسوي او په همدې هڅو کې د افغان سولې لپاره د امریکا ځانګړي استازي په قطر کې له طالبانو سره تر خبرو وروسته وویل چې ښايي ډېر ژر له یادې ډلې سره یوې هوکړې ته ورسېږي چې وروسته بیا طالبانو د یوې خبرپاڼې په خپرولو سره وویل، دوی له خلیلزاد سره له افغانستانه د بهرنیو ځواکونو پر وتلو او نورو موضوعاتو ګټورې خبرې کړې دي.