په کابل کې د اسلامي امارت د ځواکونو له خوا د چاڼیزو عملیاتو په لړ کې د خلکو د کورونو پلټلو ته لا هم غبرګونونه روان دي. مخالفین وايي چې دا کار ناسم دی، وېره خپروي او آن ځیني یې دې چارې ته قومي رنګ ورکوي. ددې کار ملاتړي بیا وایي چې د امن او ثبات لپاره دا یو ښه ګام دی. کورنیو چارو وزارت وايي چې دوی د غلو، تښتوونکو، مجرمینو او نورو شریرو کسانو پر ضد دا عملیات د خلکو په غوښتنه پیل کړي او ټول قوانین پکې مراعاتېږي.
اسلامي امارت امنیت خپله تر ټولو لویه لاسته راوړنه ګڼي، خو په دې وروستیو کې غلاوو، تښتوونو او نورو جرمونو د امارت پر دغه لاسته راوړنه سیوری غوړولی دی. خلک پرله پسې پر امارت نیوکې کوي چې د غلو او تښتوونکو پر وړاندې یې مبارزه بریالۍ نه ده. چارواکو په دې اړه د ګام پورته کولو ژمنه کوله، چې دا دی اوس یې دا چاڼیز عملیات پیل کړي چې ویل کېږي تر اوسه پورې پکې ګڼې وسلې، غلا شوي موټرونه او نور توکي د امنیتي ځواکونو لاس ته ورغلي دي. داسې ښکاري چې حکومت په دې سره د هغه ممکنه ګواښونو د له منځه وړلو هڅه هم کوي چې ویل کېږي ښايي په پسرلي کې اسلامي امارت په امنیتي برخه کې ورسره مخ شي.
ددغه کار مخالفت په دوو دلایلو کېږي. یوه ډله کسان دي چې په غلاوو، شوکو او ناقانونه کړنو کې لاس لري او یا هم د اسلامي امارت د هر ګام مخالفت کوي او هر څه ته قومي رنګ ورکوي. د دوی نیوکې او مخالفتونه مهم نه دي او یا هم د دوی مخالفتونه ددغه کار سمووالی ښیي او پکار ده چې دا کار په شدت سره دوام وکړي. دویمه ډله هغه کسان دي چې فکر کوي دا کار د قوانینو خلاف دی او د خلکو کورونه خوندي دي او هېڅوک د محکمې له حکم پرته نشي ورننوتلی. دوی د تلاشیو پر ډول او نورو اړخونو هم نیوکې کوي چې نیوکې یې تر یوه ځایه سمې هم دي. داسې ښکاري چې اسلامي امارت د دویمې ډلې نیوکو ته مثبت ځواب هم وايي او ځینې اندېښنې یې کموي. پرون د کابل امنیه قوماندانۍ داسې ویډیوګانې او عکسونه خپاره کړل چې پکې لومړی کور ته ښځینه د تالاشۍ لپاره ننوځي او بیا له هغه وروسته نارینه ورځي. ددې تر څنګ د کابل امنیه قوماندانۍ دا هم ویلي چې د ښځینه پولیسو تر څنګ د سیمې د ګذر وکیل او د جومات ملا امام هم له تالاشي کوونکو سره وي او که چېرته داسې نه وي، نو خلک کولی شي چې شکایت هم وکړي او دوی د شکایت اورېدو لپاره شمېرې هم اعلان کړې دي.
دا سمه ده چې کور په کور تالاشي او د ټولو کورونو تالاشي ځورونکې ده، خلک له ستونزو سره مخ کوي، ښايي په کور کې ښځې او ماشومان هم ووېروي، خو د امنیت لپاره دا یو مهم ګام دی. خلک باید له دې عملیاتو او تالاشیو سره مرسته وکړي، څو له غلو، تښتوونکو او نورو مجرمینو خوندي شو. امنیتي ځواکونو ته هم پکار ده چې ټول اصول مراعات کړي، ښځینه پلټونکې، د ګذر وکیل او د جومات ملا امام له ځان سره ولري او له خلکو سره پوره ښه چلند وکړي.
