اسلامي امارت پرله پسې پر دې ټینګار کوي چې مسلکي کادرونه دې له هېواده نه وځي او دلته دې خپلو خلکو ته خدمدت وکړي. د ریاست الوزرا لومړي مرستیال ملابرادر پرون یو ځل بیا پر ځواکونو مسلکي کادرونو غږ کړی چې هېواد دې نه پرېږدي، ځکه چې اوس د هېواد جوړول د ټولو ګډ مسوولیت دی. نوموړي پر ځوانانو غږ کړی چې زده کړو ته دوام ورکړي، ځانونه په ساینس، ټکنالوژۍ او نورو برخو کې ورسوي.
د ملابرادر آخوند دا غږ خوږ دی او له یوه مسوول حکومت څخه همدا تمه کېدای شي چې له خپل هېواده د کادرونو او ځوانانو د وتلو په تړاو همداسې دریځ ولري. دا یوه ښه دریځ دی، خو تر دې وړاندې په عملي برخه کې هم ګامونه پکار دي چې له بده مرغه ډېرې ستونزې پکې دي. مسلکي کادرونه به پاتې شي، خو دلته څه وکړي؟ همدا اوس چې په دولتي ادارو کې پر کوم اساس ټاکنې کېږي، دا بیا د ملا برادر او نورو چارواکو د خبرو خلاف پیغام ورکوي او ځوانانو ته وايي چې دا وطن ستاسې نه دی، دلته پوهه، علم او ټکنالوژي پکار نه ده او تاسې باید دا وطن پرېږدئ. چې کله یو ځوان په معلوماتي ټکنالوژۍ کې د ماسټرۍ ترڅنګ کلونه کلونه کاري تجربه ولري او له دندې ګوښه شي، خو پر ځای یې داسې کس راشي، چې هغه په ټول عمر کې کله هم کمپیوټر کارولی نه وي، نو دا د هغه پیغام پر مرۍ له پښې اېښودلو پرته بله څه مانا لري چې ښاغلی ملابرادر او نور چارواکي یې ورکوي. دلته خبره د سیاسي واک نه ده، ځکه خلکو اوس منلې چې سیاسي واک باید د امارت له افرادو سره وي، خو مسلکي برخې دې مسلکي کسانو ته پرېښودل شي. د اسلامي امارت چارواکو هم لومړی دا ویل چې وزارتونه سیاسي پوستونه دي او دوی به معینان مسلکي کسان راولي، خو وروسته معنیتونه هم لاندې شول، ریاستونه هم ونیول شول او خبره تر مدیریتونو او آمریتونو هم را ورسېده او لا هم روانه ده. په دې تحول کې ستونزه دا نه ده چې د امارت افراد دولتي بستونه نیسي، ستونزه دا ده چې ډېر مسلکي کسان له دندې ګوښه کېږي او پر ځای یې نامسلکي او بې تجربې کسان راځي. آن په ځینو ادار کې داسې کسان هم رییسان شوي چې مکتوب به ورته بل څوک لولي. دا حالت نه یوازې دا چې حکومتولي له ستونزو او خنډونو سره مخ کوي، بلکې مسلکي کادرونه او ځوانان ناهیلي کوي او فکر کوي چې په دې هېواد کې نور دوی ته ځای نشته، ځکه چې دا هېواد اسلامي امارت نیولی او هغوی دلته ټولې حکومتي څوکۍ او بستونه خپل حق ګڼي.
اوس مهمه خبره دا ده چې د چارواکو د دریځ او په دولتي ادارو کې د عمل ترمنځ باید یووالي راشي. په دولتي ادارو کې روان حالت باید بدل شي، باید مسلکي کادرونو او علم ته اهمیت ورکړل شي او ځوانانو ته په عملي ډول دا پیغام ورکړل شي، چې دلته دوی ته هم ځای شته او باید پاتې شي.
