د طالبانو باوري سرچينو بي بي سي ته ویلي، د دوی مرکچي پلاوی له امریکایي لوري سره د افغان دولت له زندانونو د زرګونه طالب زندانیانو د خوشې کېدو پر سر هوکړې ته نږدې شوی دی.
دې سرچینې ویلي، د دغه کار موخه د سولې ټینګښت لپاره د باور فضا رامنځته کول ښودل شوي دي.
افغان حکومت په دې اړه څه نه دي ویلي، خو د چارو شنونکي وایي، د ملابرادر او څو نورو طالب چارواکو له راخوشې کېدو داسې ښکاري چې ممکن دواړه لوري دې هوکړې ته رسېدلي وي.
سرچینه ویلي، د طالب بندیانو د خوشې کېدو پر سر وروستی ځل خبرې څو ورځې وړاندې په اسلام اباد کې د زلمي خلیلزاد او طالب استازو ترمنځ شوې دي.
سرچینې دغه راز ویلي، له طالبانو سره درې زره حکومت پلوه کسان بندیان دي، خو له دولت سره د طالب زندانیانو شمېر بیا شاوخوا لس زره یادوي.
په همدې حال کې د طالبانو د زندانونو د چارو یوې سرچینې هم بي بي سي ته ویلي چې د خپلو زندانیانو نوملړ یې چمتو کړی او امریکایي لوري ته یې سپارلی دی.
د افغانستان د زندانونو ریاست هم مني چې له دوی سره د ترهګریزو جرمونو په تور شاوخوا اته زره کسان زنداني دي.
د طالبانو ویاند ذبیح الله مجاهد هم دا خبرې نه رد او نه تائید کړې.
سیاسي شنوونکی وحید مژده چې د سولې هڅې له نږدې څارې وایي، د ملابرادر او یو شمېر نورو طالب چارواکو له خوشې کېدو داسې ښکاري چې ممکن امریکا او طالبان د بندیانو په خوشې کېدو هوکړې ته نږدې شوې وي.
