له پاکستان نه د افغان سولې په برخه کې د امریکا د مرستې غوښتلو اعلان، د واشنګټن پر وړاندې د اسلام اباد دریځ نور هم سخت کړی او اسلام اباد هڅه کوي له امریکا زیات امتیاز واخلي.
د پاکستان صدراعظم عمران خان د ډونالډ ټرمپ تر لیک وروسته په یوه مرکه کې وویل چې پاکستان د امریکا کرايي ټوپک نه دی چې د پیسو په بدل کې استعمال شي. د عمران خان له مرکې سره هممهاله د پاکستان د پوځ ویاند پر متحده ایالتونو غږ وکړ چې له افغانستانه د بایلونکي هېواد په توګه نه، بلکې د یوه دوست په توګه ژر ووځي.
نوموړي وویل: ((موږ هیله لرو چې امریکا ژر له افغانستان څخه ووځي؛ د بایلونکي په حیث نه، بلکې د یوه منطقوي دوست په حیث له دغه هېواده ووځي. له افغانستان نه د امریکا وتل هم د افغانستان په ګټه دي، هم د پاکستان او هم د ټولې سیمې.))
شنونکي وايي، چې امریکا له پاکستان څخه مرسته غواړي او پاکستان یې په بدل کې ډېر امتیازات غواړي.
د سولې په خبرو کې د امریکا اصلي غوښتنه په افغانستان کې د خپل حضور او پوځي اډو ساتل دي، خو د طالبانو په اړه هم ویل کېږي چې له امریکا سره یې په تېرو دوو پړاوونو خبرو اترو کې د هغوی پر پوځي اډو توافق نه دی کړی. اوس ویل کیږي چې امریکا له پاکستان څخه غواړي چې پر طالبانو فشار راوړي او پوځي اډې ومني، خو پاکستان ددې کار په بدل کې له امریکا د سترو امتیازاتو غوښتنه کوي.
د شنونکو په باور، متحده ایالتونو په تېرو اوولسو کلونو کې د ترهګرۍ ضد جګړې په ترڅ کې د سیمه ییزې همکارۍ پرځای پاکستان ته ترجیح او امتیاز ورکړي او اوس د دغو غلطو سیاستونو بیه افغانستان ور کوي.
د چارو شنونکی او پوځي کارپوه محمداګل مجاهد وایي: (( بې له شکه امریکا چې په تېرو اوولسو کلونو کې په افغانستان کوم سیاستونه مخ ته یوړل غلط وو او دوی چې دلته په کوم شعار راغلي وو، عملي نه شو. امریکایان په دې بهانه راغلل چې په افغانستان نشه یې توکي ختموو، ترورېزم له منځه وړو او ښه حکومتولي جوړوو او بشري حقونه تامینوو چې برعکس تروریستان له یوې ډلې څخه ۲۲ ډلو ته زیات شول، نشه یې توکي څو چنده زیات شوي او ښه حکومتولي رامنځته نه شوه، نو له همدې ددوی غلطو پالیسیو هم دوی ته ضرر رسولی او هم یې له افغانانو څخه ډېرې قربانۍ اخیستې.))
پاکستان د افغان سولې په برخه کې متحده ایالتونو ته خپل شرایط په داسې حال کې سخت کړي چې داسې اندېښنې هم موجودې دي چې واشنګټن له اسلام اباد سره د افغانستان پر سر کومې نوې معاملې ته غاړه کېنږدي.
