د افغانستان د بهرنیو چارو سرپرست وزیر په ترکیه کې د انتالیا دیپلوماسۍ فورم کې ګډون کړی او هلته یې د دیپلوماسۍ او د افغانستان په تړاو خبرې کړي دي. دې غونډې ته د نړۍ د بېلابېلو هېوادونو او سازمانونو نږدې دوه زره استازي وربلل شوي وو چې پکې چارواکي، سیاستوال او پالیسي جوړونکي ګډون لري. د غونډې کډونوال د پالیسۍ، دیپلوماسۍ او سوداګرۍ په اړه خپل لیدلوري سره شریک کوي. له دې امله چې دا غونډه د اوکراین د کړکېچ په اوج کې کېږي، نو د اوکراین کړکېچ پر ټولو موضوعاتو سیوری غوړولی، خو د افغانستان موضوع هم ورسره په څنګ کې یادېږي.
د انتالیا دیپلوماسۍ فورم یوه مهمه ناسته ده چې اسلامي امارت ته هم پکې د ګډون چانس ورکړ شوی دی. دا لومړی ځل دی چې د اسلامي امارت استازي په داسې یوه مهمه غونډه کې ګډون کوي او خپل دریځ بیانوي. دا په واقعیت کې اسلامي امارت ته دریځ ورکول دي چې ورو ورو په نړیوالو غونډه کې را ښکاره شي او د افغانستان استازیتوب وکړي. دا چاره به له رسمیت پېژندنې سره هم مرسته وکړي، ځکه چې یو خو په رسمي ډول اسلامي امارت د افغانستان د استازي په توګه برخه اخلي او بل له نړۍ سره د خبرو او تفاهم له لارې ستونزې کمېږي او رسمیت ته لاره هوارېږي. په دې او دې ته ورته غونډو کې د اسلامي امارت د استازو ګډون او د افغانستان په استازیتوب یې منل، خپله پر دې اقرار دی چې دوی د افغانستان رسمي استازي دي او دولت یې د افغانستان واکمن او مشروع دولت دی.
د انتالیا دیپلوماسۍ فورم کې د اسلامي امارت د استازي دریځ هم ښه دریځ و او له دې چانس څخه د استفادې ښه هڅه وه. د دیپلوماسۍ په اړه د امیرخان متقي څرګندونې نه یوازې د یوه خپلواک افغانستان غږ دی، بلکې د ډېرو نورو هېوادونو له دریځ سره هم یو شان دی. ددې تر څنګ د افغانستان د حکومت او راتلونکي په اړه د ښاغلي متقي څرګندونې د نړیوالو رسنیو هغه تبلیغات ننګوي چې د افغانستان په تړاو یې کوي. ددې تر څنګ د ستونزو او خنډونو په اړه هم یو واقعي تصویر پکار دی چې ښاغلي متقي تر ډېره پورې ورکړی دی. له بله اړخه د افغانستان د کنګل شوو شتمنیو په اړه هم د افغانستان د غږ ښه انعکاس وشو او نړۍ ته باید بیا بیا وښودل شي چې افغانان مظلوم دي او امریکا د بې وزله افغانانو شتمني په زور او جبر سره لاندې کوي او نړۍ باید له افغانانو سره مرسته وکړي چې خپله شتمني لاس ته راوړي.
له شک پرته چې په انتالیا دیپلوماسۍ فورم کې د افغانستان ښه استازیتوب وشو، خو دا چې کورني سیاستونه د بهرني سیاست قوت او کمزوري ټاکي، نو په کور دننه زموږ په سیاستونو کې ستونزو، زموږ دیپلوماسۍ ته خنډونه هم پیدا کړي دي. اسلامي امارت باید لا زیات نرمښت وښيي، په حکومت کې نوي مسلکي کسان ور ګډ کړي، نورو افغانانو ته په سیاست او حکومت کې ونډه ورکړي. که اسلامي امارت دا کار وکړي، نو زموږ دیپلوماسي به لا زیاته غښتلې شي او د افغانستان غږ به په نړیوالو دریځونو لا زیات پیاوړی وي.
