افغانستان او ترکیې یو ځل بیا د افغانستان د هوايي ډګرونو د مدیریت او امنیت په تړاو خبرې کړي دي. د افغانستان د بهرنیو چارو سرپرست وزیر امیرخان متقي د انتالیا دیپلوماسۍ فورم کې له ګډون وروسته د ترکیې له بهرنیو چارو وزیر سره کتلي دي او د نورو مسایلو ترڅنګ یې د افغانستان د هوايي ډګرونو د مدیریت او امنیت په تړاو هم بحثونه کړي دي. دواړو لورو پر دې چاره پخوا هم خبرې کړې وې، خو لا هم په دې برخه کې کوم توافق ته نه دي رسېدلي. دا ځل دواړه لوري هڅه کوي چې په دې اړه ژر یوې پایلې ته ورسېږي.
د اسلامي امارت له واکمنۍ وروسته د افغانستان هوایي ډګرونه له ستونزو سره مخ دي او له همدې امله ډېرو هېوادونو ته مخامخ الوتنې نه کېږي او یا هم پرې سخت محدودیتونه دي. له پیله ویل کېدل چې د هوايي ډګرونو د امنیت او مدیریت چارې به قطر ته سپارل کېږي، خو وروسته معلومه شوه چې قطر دا کار له ترکیې سره په ګډه مخ ته وړي او په یوازې ځان دې کار ته حاضر نه دی. له بله اړخه متحده عربي اماراتو هم هڅه کوله چې د افغانستان د هوايي ډګرونو د مدیریت او امنیت مسوولیت واخلي. دواړو اړخونو په دې اړه له اسلامي امارت سره خبرې کړي دي او ان له خپله اړخه یې وړاندیزونه او ټول جزیات هم وړاندې کړي دي، خو لا هم دا چاره نه ده وروستۍ شوې. ستونزه د هوايي ډګرونو د مدیریت پر ځای تر ډېره د امنیتي چارې اړوند ده. ترکیه غواړي چې د کابل هوايي ډګر د ساتنې لپاره خپل ځواکونه راولي او بیا د هوايي ډګر د مدیریت او امنیت چارې پر غاړه واخلي، خو اسلامي امارت له دې سره مخالفت کوي. متحده عربي امارات بیا د امنیت لپاره یوازې یوه امنیتي کمپنۍ د هوايي ډګر په داخل کې ګوماري چې دا کار پخوا هم کېده او معمول هم دی، خو ترکیه له قطر سره په ګډه د ټول هوايي ډګر د امنیت اخیستو هڅه کوي. له شک پرته چې د متحده عربي اماراتو وړاندیز له هره اړخه د اسلامي امارت په ګټه دی، خو له دې امله چې قطر له اسلامي امارت سره ډېره مرسته کړې ده، نو ځکه اسلامي امارت نه غواړي چې اماراتو ته ددغه قرارداد په ورکولو سره قطریان خپه کړي. له بله اړخه د متحده عربي اماراتو او اسلامي امارت اړیکې له پخوا سړې وې او یو پر بل زیات باور هم نه لري. د اسلامي امارت تمایل دا دی چې دا قرارداد قطر او ترکیې ته ورکړي، خو ستونزه د ځواکونو په راوستلو کې ده. اسلامي امارت وايي چې دوی د بهرنیو ځواکونو پر ضد جګړه کړې ده، خو که اوس د افغانستان یوې برخې ته هم په هره پلمه بهرني ځواکونه راځي، نو دا د دوی پر مبارزه کرښه را ایستل دي. له بله اړخه پر ترکیه ځیني نور شکونه هم شته او له وړاندې اسلامي امارت ته ویل شوي چې ترکیه ځکه د امنیت اخیستو هڅه کوي چې نورې موخې لري. له همدې امله د هوايي ډګرونو د امنیت او مدیریت ستونزه لا هم پر ځای پاتې ده.
د هوايي ډګرونو امنیت او مدیریت زموږ لپاره زیات ارزښت لري او پکار ده چې په دې اړه ژر وروستۍ پرېکړه وشي، خو د هوايي ډګرونو د امنیت په پلمه د هېڅ بهرني هېواد ځواکونو ته باید اجازه ور نه کړل شي او په دې اړه تر اوسه د اسلامي امارت دریځ د ستایلو دی.
