د مشرانو جرګې رییس د کابل د رایو لغوه کېدو ته په اشارې وايي، د ټاکنیزو شکایتونو کمېسیون حق نه لري چې د یوې ټاکنیزې حوزې ټولې رایې باطلې اعلان کړي.
د ټاکنیزو شکایتونو کمېسیون د تېرې پنجشنبې په ورځ په کابل کې د ولسي جرګې ټاکنې له درغلیو او سرغړونو ډکې وبللې او اعلان یې وکړ چې د ټاکنو د قانون او د کمزوري مديریت له امله د یادې ټاکنیزې حوزې ټولې رایې باطلې دي.
خو له دې ټاکنیزې ستونزې د خلاصون لپاره وړمه ورځ د ولسمشر د دویم مرستیال سرور دانش تر مشرۍ لاندې د دواړو کمېسیونونو د رییسانو، د سترې محکمې د رییس، لوی څارنوال، د اساسي قانون پر تطبیق د څار کمېسیون د رییس، د سیمه ییزو ارګانونو د رییس او د احصایې او معلوماتو د ملي ادارې د رییس په ګډون ناسته وشوه.
په دې ناسته کې پرېکړه وشوه چې د ټاکنیزو شکایتونو کمېسیون دې پر خپلې پرېکړې بیا غور وکړي او د کابل د ټاکنیزې حوزې د رایو د باطلېدو په تړاو دې د لېندۍ ماشتې د ۱۴مې پرېکړه و ځنډوي.
د مشرانو جرګې په پرونۍ ناسته کې د کابل د ټاکنیزې حوزې د رایو د لغوه کېدو په تړاو بحث وشو.
په دې جرګه کې د کندوز د خلکو استازي عبدالله قرلق د ټاکنیزو شکایتونو د کمېسیون پرېکړه ته په اشارې وویل: «په ټاکنیزو کمېسیونونو کې اختلاف هېواد د بحران لوري ته بیايي. د خلکو پر رایو او برخلیک باید لوبې ونه شي، که حالت دا ډول وي خدای پوهېږي چې دغه کمېسیونونه به ولسمشریزې ټاکنې څه ډول مدیریت کړي.»
په مشرانو جرګه کې د کابل د خلکو استازي فرهاد د ټاکنیزو شکایتونو له کمېسیونه وغوښتل چې له قانون سره سم پاکې رایې له ناپاکو رایو جلا کړي او له درغلي کوونکو سره دې قانوني چلند وشي.
په جرګه کې د کاپیسا د خلکو استازي مولوي محی الدین منصف وویل: «د ټاکنیزو شکایتونو کمېسیون داسې کار کوي چې د ټاکنیزو کمېسیونونو او حکومت حیثیت تر پوښتنې لاندې راولي، که شواهد لري، نو له پرېکړې یې باید تېر نه شي، خو که پوره شواهد نه لري، باید د ټاکنیزو شکایتونو کمېسیون تر تعقیب لاندې ونیول شي. ځکه له قانون سره یې لوبې کړې او د دوی دغه کار قانوني بڼه پیدا کړې ده.»
د دې جرګې رییس فضل هادي مسلمیار وویل، د ټاکنیزو شکایتونو کمېسیون پرېکړه قانوني بڼه نه لري.
نوموړي زیاته کړه، د ټاکنیزو شکایتونو کمېسیون د قانون له مخې یوازې کولای شي د شکایت پر اساس د رایې ورکونې د یوه مرکز او یا یوه ځانګړي نوماند رایې باطلې کړي او یا يې له سره وشمېري.
هغه وویل، د قانون له مخې دغه کمېسیون د یوې ټاکنیزې حوزې د ټولو رایو د باطلېدو صلاحیت نه لري.
د نوموړي په خبره، د قانون له مخې د ټاکنیزو شکایتونو کمېسیون باید دا پرېکړه د ټاکنو د لومړنیو پایلو تر اعلان وروسته رسنیزه کړې وای.
