په ختیځ کې د سرحدي ځواکونو قوماندان برید جنرال محمد ایوب حسین خېل رسنیو ته ويلي، دې دوی د شپږم کنډک سرتېرو له یوه قاچاق وړونکي سره بېلابېلې وسلې نيولې چې د ډیورنډ کرښې له هغې غاړې یې افغانستان ته را قاچاق کولې.
نوموړي ویلي: «زموږ شپږم سرحدي کنډک چې په دور بابا ولسوالۍ کې یې دویم ټولی دی، هغوی وکړای شول چې له دغه کس سره دوه ميله پيکا، اته ميله کلاشینکوفونه او شپاړس ميله برېټا تفنګچې چې د ترورېستي اعمالو لپاره یې افغانستان ته را انتقالولې، په یوه کمين کې نیولې».
له دې وړاندې د ختيځ یوشمېر اوسېدونکو اندېښنه ښکاره کړې چې دلته د وسله والو ډلو لپاره وسلې او مهمات د ډیورنډ کرښې له هغې غاړې دېته راوړل کېږي.
د ننګرهار یوشمېر مدني فعالان هم په دې اند دي، تر هغې چې د ډیورنډ پر کرښه د وسلو، مهماتو او په نورو برخو کې د قاچاق مخه ونه نیول شي، په دې سیمه کې د امن راتګ ستونزمن دی.
د دغه ولایت مدني فعال اسدالله ښالېز ويلي، پر دغو لارو پخوا هم قاچاق کېده، خو اوس د قاچاق بڼه بدله شوې. نوموړی وایي، د ډیورنډ کرښې اوږدوالي ته په کتو باید د ځواکونو شمېر هم لوړ شي.
نوموړي زیاته کړې: «ساحه دومره پراخه ده چې دغه شمېر ځواکونه چې هلته ځای پر ځای دي، کافي نه دي، که کافي وای، د دغه قاچاق مخه به ورسره نیول شوې وای. دا نن چې یو کس نیول شوی، زه په دې ډاډه یم چې پر دې قاچاقي لارو اوس هم د وسلو او نورو مهماتو حمل او نقل کېږي، خو پخوا اقتصادي برخه وه، اوس دغه برخه په جنګي اقتصادي برخه بدله شوې او اوس هم د وسلو قاچاق کېږي چې باید دا قاچاقي لارې وتړل شي.»
له دې وړاندې هم سرحدي ځواکونو په وار وار د مهماتو او د وسلو د نيول کېدو خبر ورکړی، خو یوشمېر شنونکي بيا د سرتېرو له خوا د وسلو او مهماتو نيول لويه لاسته راوړنه بولي او ټینګار کوي چې پر دې کرښه به ټولې قاچاقي لارې په بشپړ ډول وتړي.
