د ولسي جرګې د نړیوالو اړیکو کمېسیون وايي، پاکستان د تل په څېر بیا هم په دې هڅه کې دی چې د افغان سولې په پروسه کې په خپلو دروغجنو ژمنو سره افغانستان او امریکا تېر باسي.
د دغه کمېسیون مرستیال داود کلکاني د يکشنبې په ورځ ازادي راډيو ته وویل چې پاکستاني چارواکي د امریکا له خوا پر هغه هېواد د فشارونو د کمولو لپاره هڅه کوي چې وښيي د افغانستان د سولې په برخه کې يې همکاري رښتینې ده.
نوموړي وویل: « قریشي ښايي د دې لپاره چې پر خپل هېواد د امریکا فشارونه يوه اندازه کم کړي او وتوانېږي چې یو ځل بیا افغانستان او امریکا په خپل چل کې راګیر کړي، کوښښ کوي چې د افغانستان د سولې په بهیر کې د خپل هېواد همکاري رښتینې وښيي او ووايي چې موږ ستاسو غوښتنه پر ځای کوو».
نوموړی وايي، افغان چارواکي باید په څرګند ډول له پاکستانه وغواړي چې د طالبانو له ملاتړ او د افغانستان په کورنیو چارو کې له مداخلو لاس واخلي.
دا په داسې حال کې ده چې يوشمېر پاکستاني رسنیو ویلي، ټاکل شوې چې د پاکستان د بهرنیو چارو وزیر د افغانستان او پاکستان ترمنځ د اړیکو د ښه کولو په موخه راتلونکې اونۍ کابل ته سفر وکړي.
دغو رسنیو ویلي، قریشي د افغان سولې په برخه کې د امریکا له خوا د پاکستان د همکاریو د جلبولو په لړ کې کابل ته سفر کوي.
دا څرګندونې په داسې حال کې دي چې د تېرې چهارشنبې په ورځ د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد په اسلام اباد کې د پاکستان له لومړي وزیر عمران خان سره ولیدل، خو ویل شوي چې په دغه لیدنه کې د افغانستان د سولې په برخه کې کومه نوې ژمنه ونشوه.
خو د پاکستان د لومړي وزیر دفتر ویلي چې د دغه هېواد د بهرنیو چارو وزیر شاه محمود قریشي خلیلزاد ته ډاډ ورکړی چې اسلام اباد به د افغان حکومت او طالبانو ترمنځ د سولې په برخه کې همکاري وکړي.
له دې وړاندې د امریکا ولسمشر د پاکستان صدراعظم ته د يوه لیک په لېږلو سره له دغه هېواده غوښتي وو چې د افغان سولې په پروسه کې همکاري وکړي.
امریکايي چارواکي له اوږدې مودې راهیسي پر پاکستان فشارونه راوړي چې په خپله خاوره کې مېشت طالب مشران له افغان حکومت سره د سولې خبرو ته کېنوي، خو له دې ټولو سره سره د نړیوالو اړیکو کارپوه انتظار خادم وايي چې د افغان سولې بهیر په دې وروستیو کې اجباري جنبې خپلې کړې او پاکستان په دې هڅه کې دی چې په دې برخه کې د چمتووالي په ښودلو سره امتیازات واخلي.
خادم وایي: «پاکستانیان په دې پوهېږي چې که په افغانستان کې سوله راځي، نو د دوی امتیازات باید خوندي وي. کله چې شاه محمود قریشي افغانستان ته راځي، نو غواړي چې نړۍ ته داسې وښيي چې دوی د افغانستان د سولې په پروسه کې جدي دي، نو ویلای شو چې د افغانستان سوله اجباري ده او ټولې خواوې چمتووالی نیسي، خو غواړي امتیاز د دوی په لاس کې وي.»
