په ټولنیزو رسنیو کې داسې اوازې دي چې ښايي د نجونو پر مخ د ښوونځیو دروازې ژر پرانیستل شي. ویل کېږي چې د نجونو زده کوونکو د جامو او نورو اړوندو مسایلو په تړاو طرحه جوړه شوې ده او له تاییدۍ وروسته به یې ښوونځي پرانیستل شي. معلومه نه ده چې دا چاره به څومره وخت واخلي، خو اټکل کېږي چې په دې اړه به ژر رسمي اعلان وشي.
تر نامعلومې نېټې پورې د نجونو د ښوونځیو د پرانیستې مخنیوی، د اسلامي امارت داسې پرېکړه وه چې په شدت سره په کوردننه او بهر له غبرګونونو سره مخ شوه. آن ویل کېدای شي چې واک ته د اسلامي امارت له رسېدو وروسته دا تر ټولو ناوړه پرېکړه وه، چې پخپله د امارت دننه هم له سخت مخالفت سره مخ شوه او یوه برخه دا مخالفت علني هم شو، خو ډېری کسانو یې دا مخالفت پټ وساته. دې پرېکړې ولس سخت ناهیلی کړ، ډېرو خلکو په راتلونکې او د اسلامي امارت پر ارادې شک وکړ او ځینو فکر وکړ چې اسلامي امارت غواړي د خپلې لومړۍ دورې واکمنۍ په شان چلند وکړي. ان له دې پرېکړې وروسته ځینو خلکو پرېکړه وکړه چې د خپلو اولادونو د تعلیم لپاره افغانستان پرېږدي. د اسلامي امارت دې پرېکړې نږدې په هر کور کې خواشیني خپره کړه، نجونې خپل برخلیک ته او کورنۍ یې خپلو لوڼو ته خپه وې. ددې تر څنګ دا پرېکړه ځکه هم ډېره دردونکې وه چې اسلامي امارت بیا بیا د نجونو د ښوونځیو د پرانیستې ژمنه کړې وه، خو چې کله یې وخت راغی، نو دوی په ناڅاپي ډول ددې ژمنې عمل کول وځنډول. له بله اړخه دې پرېکړې په ولس کې د اسلامي امارت محبوبیت ته هم زیان ورساوه، ښايي له همدې کبله به وي چې د امارت ډېری غړي هم پر دې پرېکړه خواشیني وو. د نجونو د ښوونځیو په تړاو دې پرېکړې په نړیواله کچه هم اسلامي امارت له ستونزو سره مخ کړ، امارت د نجونو د تعلیم مخالف معرفي شو او ډېری هېوادونو وویل چې د اسلامي امارت د ژمنو او عمل ترمنځ یووالی نشته او له همدې کبله باید په تعامل کې ورسره احتیاط وشي.
اوس چې د نجونو د ښوونځیو د پرانیستنې په تړاو مثبت خبرونه مخ ته راځي، دا یو ښه ګام دی. څومره ژر چې ممکن وي باید ښوونځي پرانیستل شي، ځکه چې اسلامي امارت په دې سره په کوردننه هم خلک خوشاله کوي او هم په نړیواله کچه پر خپل ځان زیاتېدونکي فشارونه کمولی شي. اسلامي امارت دې د ښوونځیو په تړاو ټول اسلامي او افغاني ارزښتونه عملي کړي، زده کوونکې دې په پوره اسلامي حجاب کې وي، په ښوونځي کې دې ټولې ښوونکې ښځینه وي او نور ټول چاپیریال دې ورته جوړ وي. ولس همدا غواړي او د همدې چارې ملاتړ کوي، خو ښوونځي دې پرانیستل شي. کله چې ښوونځي پرانیستل شي، نړۍ بیا پر دې نیوکې نه شي کولای چې زموږ د نجونو جامې څنګه دي او له دې کبله چې دا زموږ د ارزښتونو بحث دی، نو ولس به د امارت تر څنګ ولاړ وي او د نړۍ فشارونو به خپله مانا او ارزښت له لاسه ورکړي وي. له همدې امله څومره ژر چې شونې وي، د اسلامي او افغاني ارزښتونو په رڼا کې باید ښوونځي پرانیستل شي.
