د سولې عالي شورا د دارالانشا نوی ريیس عمر داودزی وايي، د زلمي خلیلزاد د هڅو له پیل سره په وضعیت کې تغیر راغلی او اړتیا ده چې د سولې په اړه نوې تګلاره جوړه شي.
داودزی چې تازه د ولسمشر اشرف غني له خوا د سولې په اړه د سیمه ییزې اجماع د ځانګړي استازي او د سولې عالي شورا د دارالانشا رییس ټاکل شوی، ویلي چې دغه شورا به له اوسني وضعیت سره سمه جوړه کړي.
نوموړي له ازادي راډیو سره په مرکه کې ویلي چې د سولې په اړه یوې نوې تګلارې ته اړتیا ده چې د ده په وینا، د پخوانیو طرحو تر ارزولو وروسته به یې جوړه کړي.
داودزي په دې اړه ویلي:«یوه پوره نوې ستراتېژي به جوړوو. پخوانۍ تګلارې، پلانونه او طرحې به ګورو او له دغه نوي حالت سره به یې عیاروو. اوس د خلیلزاد صاحب د ماموریت نه بعد، یو نوی حالت ایجاد شوی؛ هم د منطقې په روابطو کې، هم د سولې په اړه نوي فرصتونه رامنځته شوي. د سولې شورا به هم له دغه نوي حالت سره عیاروو.»
هغه ویلي، تګلاره به په ګډه جوړوي چې د سولې خبرې، د سولې راوستل او سولې تل پاتې کېدل به پکې شامل وي.
داودزي تر دې مخکې په قطر کې د پګواش موسسې په چوکاټ کې له طالبانو سره لیدلي او وايي چې پکار ده دا ډله هم انعطاف ښکاره کړي.
طالبانو یوه میاشت مخکې د سولې شورا له ځینو استازو سره په مسکو کې د روسیې په کوربهتوب ولیدل، خو ویې ویل چې اوس د سولې خبرې یوازې له امریکایانو سره کوي.
امریکا هم خپل واک افغانيالاصله امریکایي سیاستوال زلمي خلیلزاد ته ورکړی چې اوسمهال په یوه اوږده سفر د سیمې هېوادونو ته وتلی دی.
د سولې شورا د دارالانشا نوی رییس د خلیلزاد هڅې مثبتې ارزوي او وايي، د سولې شریکې هڅې به هرومرو یوه نتیجه ورکړي.
نوموړي زیاته کړه: «دا علایم شته چې پهخیر له انتخاباتو مخکې سولې ته ورسېږو. د امریکا د دولت خاص استازي په توګه خلیلزاد صاحب په سیمه کې خاص اثر رسوخ لري، سابقه لري دلته. کارونه یې ښه روان دي، په ګډه یعنې د هغه کار او د افغان دولت کار او د خلکو هڅې او د طالبانو انعطاف پذیري به موږ د مشکل د حل یوه سرحد ته ورسوي.»
د افغان حکومت له لوري سولې ته د رسېدو د هڅو په دوام د سولې د خبرو نوي جوړ شوي مرکچي پلاوي هم د یکشنبې په شپه په ارګ کې له افغان ولسمشر اشرف غني سره لیدلي چې ولسمشر د سولې د خبرو لارښوونه ورته کړې.
سیمې ته د خلیلزاد سفر، د افغان حکومت له لوري د سولې هڅې او د رپوټونو په اساس راتلونکې اونۍ کابل ته د پاکستان د بهرنیو چارو وزیر شاه محمود قریشي سفر، هغه څه دي چې د سولې روانې هڅې لا پسې چټکې ښکاروي.
