د کار او ټولنیزو چارو وزیر فیض الله ذکي وايي، له متحده عربي اماراتو سره د شوې هوکړې له مخې ټاکل شوې چې د راتلونکي لمریز کال د وري په میاشت کې ۲۵۰۰ افغان کارګر دغه هېواد ته د کار لپاره واستول شي.
نوموړي د کاري مهاجرت د پرانیستغونډې په څنډه کې ازادي راډیو ته وویل چې له سعودي عربستان سره هم خبرې روانې دي څو په دغه هېواد کې هم افغان کارګرو ته د کار کولو زمینه برابره کړي.
ذکي وویل: «لومړۍ جوپه به ډېره غټه نه وي، یعنې تر ۲۵۰۰ افغان کارګر به وي چې د حمل په میاشت کې به استول کېږي. دا پس له دېرشو کلونو یوه ډله افغان کارګر دي چې بهر ته استول کېږي، نو موږ به ډېره هڅه وکړو چې دا پروسه په ډېر منظم شکل پرمخ ولاړه شي، ځکه موږ غواړو چې وروسته لاره هواره شي او د دغه هوکړه لیک پر وړاندې چې کوم احتمالي خنډونه موجود دي، باید مخه يې ونیول شي.»
د کار او ټولنیزو چارو وزارت په داسې حال کې اماراتو ته د افغان کارګرو د لېږلو خبره کوي چې په افغانستان کې د وزګارو ځوانانو شمېر ورځ تر بلې د ډېرېدو په حال کې دی. نا امني، اداري فساد، د لازمو پالیسيو او د کاري اسانتیاوو نشتون په هېواد کې د بېکارۍ او بېوزلۍ د پراختیا مهم لاملونه ګڼل کېږي.
د دغه وزارت د معلوماتو له مخې، په هېواد کې د کار په شرایطو برابر ۱،۹ میلیونه کسان بېکاره دي، خو ذکي وايي، هڅه کوي چې د بېکارۍ کچه راټيټه کړي.
د افغان کارګرو له حقوقو ساتنه، کاري مهاجرت ته پراختیا ورکول او په بهر کې افغان کارګرو ته د کار زمینه برابرول، په بهر کې د افغان کډوالو مدیریت او کورنیو ته د کارګرو د پیسو د استولو تنظیمول، هغه څه دي چې د ذکي په وینا، د کاري مهاجرت په ستراتېژۍ کې ځای ورکړل شوی دی.
نوموړی وايي، له دې وړاندې به بهرنیو هېوادونو ته افغان کارګر د ګاونډيو هېوادونو په ځانګړي ډول د پاکستان په پاسپورټ تلل، خو د دې ستراتېژۍ له مخې به په افغاني پاسپورټ کار ته استول کېږي.
په ورته وخت کې د افغانستان د کارګرانو ملي ټولنه د دې ستراتېژۍ هرکلی کوي، خو وايي چې بهرنیو هېوادونو ته د کار لپاره د افغانانو د استولو په مسئله کې باید هغه چاته د لومړیتوب حق ورکړل شي چې پر کار پوه او بهرنۍ ژبه يې زده وي.
د دې ټولنې مشر معروف قادري وايي: «زموږ غوښتنه دا ده چې باید د کار او ټولنیزو چارو وزارت او نړیوالې ټولنې له لوري د مهارت د تثبیت یوه ګډه کمېټه جوړه شي، تر څو د افغان کارګرو مهارتونه وڅېړي او معلوم يې کړي چې څوک په کومه برخه کې مهارت لري. همدا شان باید وړاندې له وړاندې د کارګرو کاري مهارتونه لوړ کړي او کوم هېواد ته چې استول کېږي، باید د هغه هېواد ژبه ور زده کړل شي، تر څو د افغانستان ښه نماینده ګي وکړي.»
قادري وايي، هر کال د کار په شرایطو برابر ۴۰۰ زره افغان ځوانان د بېکارۍ په ډله ور زیاتېږي او له امله یې ۴۰ سلنه افغانان د بېوزلۍ تر کرښې لاندې ژوند کوي، خو حکومت په وار وار ژمنه کړې چې د بېکارۍ د کچې د کمولو لپاره يې هلې ځلې کړې او دا ستونزه د حکومت لومړیتوب دی.
