د چین د دولت رئیس شي جين پينګ د اپریل په ۲۱مه نېټه د بو او اسیايي فورم د ۲۰۲۲م کلنۍ غونډې په پرانیستونکو مراسمو کې انلاین ګډون او وینا وکړه.
نوموړي په خپلو خبرو کې پر دې ټينګار وکړ، چې د سیمې سوله او ارامتیا د سیمې هېوادونو د ګډو کوښښونو په پایله کې رامځته کيږي او د نورو لخوا ورته د سولې ډالۍ نه ورکول کيږي، نو ټول هيوادونه بايد د سولې او ثبات لپاره هلې ځلې وکړي.
نوموړي وويل، چې اوسمهال د اسیا لخوا وړاندې شوي په سوله کې د ګډ ژوند ۵ اصول او د بان دونګ روحیه ستر عملي ارزښت لري او بايد پلې کېدو ته يې ډېره پاملرنه وشي.
شي جين پينګ زياته کړه، چې ټول هيوادونه باید د متقابل درناوي، د ګډو ګټو پر بنسټ د همکارۍ او په سوله کې د ګډ ژوند په شمول پر ځينو اصولو ټينګار وکړي او د ښه ګاونډیتوب تګلارې دې پلې کړي او خپل برخليک بايد په خپلو لاسونو کې واخلي او ټول چارې بايد په خپله کنټرول کړو.
نوموړي زياته کړه، چې نړيوال دې د بېلا بېلو هېوادونو امنيتي پاملرنو ته توجه وکړي او یو برابر، اغېزمن او دوامدار امنیتي چوکاټ دې جوړ او د خبرو اترو او مشورو له لارې دې د هېوادونو ترمنځ شخړې او اختلافات لیرې کړي، د بحرانونو د سوله ييز حل لپاره دې له ټولو کوښښونو څخه ملاتړ او له دوه ګونو معیارونو او یواړخیزو بندیزونو سره دې مخالفت وکړي او د عنعنوي او رسمي اړيکو د خوندیتوب لپاره دې ښه چلند وکړي او په ګډه دې د سیمې کړکچ، ترهګرۍ، اقلیمی بدلون، انټرنيټي او بیولوژيکي امنیت په شمول له نړیوالو ننګونو سره مقابلې وکړي.
نوموړي په خپلو خبرو کې وویل، چې امنیت د پرمختګ بنسټ بلل کيږي او ټول انسانان د امنیت ګډ برخليک لري. واقعیتونو دا ښودلې، چې د سړې جګړې نظرونه د ګردې نړۍ سوله ييز چوکاټ خرابوي، زورواکي او تسلط د نړۍ سولې ته ګواښونه رسوي او ډله ييزې مقابلې به په روانه پېړۍ کې امنیتي ننګونې نورې هم زیاتې کړي.
