د افغان سولې لپاره د امريکا ځانګړي استازي د ازبکستان له مشرانو سره د سولې پر پروسه خبرې کړې دي.
د ازبکستان په پلازمېنه تاشکند کې د امريکا سفارت لهخوا په خپره شوې خبرپاڼه کې راغلي چې خليلزاد د ازبکستان له ولسمشر شوکت مرزايوف، د بهرنيو چارو وزير او نورو چارواکو سره ليدلي دي.
سرچينې زياته کړې چې دواړو لورو د افغان سولې پر پروسه، پرمختګونو او راتلونکو پلانونو خبرې کړې دي، خو دغه سفارت د دې ليدنې په اړه نور جزيات نه دي ورکړي.
بلخوا د ازبکستان د بهرنيو چارو وزارت لهخوا په خپره شوې خبرپاڼه کې راغلي چې د زلمي خليلزاد ترڅنګ په دې ليدنه کې د امريکا د بهرنيو چارو وزارت د سوېلي او مرکزي اسيا هېوادونو په برخو کې مرستيال وزير هم شتون درلود.
سرچينې زياته کړې، دواړو خواوو پر دې ټینګار وکړ چې افغان شخړه نظامي حل نه لري، نو اړینه ده چې دې جګړې ته د سیاسي لارو چارو له مخې حل وموندل شي. دغه راز په دې لیدنه کې د افغانستان د سولې په اړه د تاشکند پر پخواني کنفرانس هم خبرې شوې دي.
په خبرپاڼه کې راغلي، دواړو پر دې هم موافقه وکړه چې هېڅ افغان لورى بايد د سولې له پروسې پاتې نه شي او دا پروسه بايد افغان شموله وي.
وروسته له هغې چې د امریکا د بهرنیو چارو وزارت د افغان سولې لپاره خلیلزاد د ځانګړي استازي په توګه ټاکلی، نوموړي د افغان جګړې د پای ته رسولو او له طالبانو سره د سولې خبرو د بریالیتوب لپاره نړیوال او سیمه ییز سفرونه پیل کړي چې د دغو سفرونو په لړ کې یې د وسله والو طالبانو له استازو سره هم په قطر کې دوه ځلې مخامخ لیدنې شوې دي.
د يادونې ده چې زلمى خليلزاد د افغان سولې په اړه په خپل درېيم سفر کې تر اوسه پاکستان، افغانستان او روسيې ته سفرونه کړي. ټاکل شوې چې هغه به قطر، متحده عربي اماراتو او بلجيم ته هم سفرونه وکړي.
