د سولې عالي شورا د افغان سولې په برخه کې د سیمې، په ځانګړي ډول د هندوستان په مرسته ټینګار کوي او وايي، ټول ګاونډي هېوادونه باید د افغان سولې په برخه کې د خپل توان په اندازه مرسته وکړي.
د دې شورا مرستیال قاضي محمدامین وقاد دا څرګندونې وروسته له هغې وکړې چې د پاکستان د بهرنیو چارو وزیر شاه محمود قریشي ویلي، په افغانستان کې د هند مرستې ته په کتو، اړتیا ده چې یاد هېواد هم په افغان سوله کې مرسته وکړي.
وقاد په دې اړه ازادي راډيو ته وویل: «زموږ هیله دا ده چې پاکستان په خپل ځای کې د افغانستان په سوله کې نقش ولري او نور هېوادونه چې په دې برخه کې کوم رول لوبوي، باید مخالفت يې ونه کړي. دا چې اوس يې په افغان سوله کې د هندوستان د همکارۍ غوښتنه کړې دا پر ځای غوښتنه ده، موږ يې موقف تاييدوو او هیله لرو چې ټول ګاونډي او سیمه ییز هېوادونه د افغانستان د سولې په پروسه کې په خپل قدرت او صلاحیت چې لري یې، مرسته وکړي.»
د پاکستاني رسنیو د راپور په اساس د دغه هېواد د بهرنیو چارو وزیر وړمه ورځ د دغه هېواد پارلمان ته په وینا کې ویلي، متحده ایالتونه چې د افغان سولې په اړه له پاکستانه کومې غوښتنې لري، دا یوازې د پاکستان په وس نه دي پوره او د سیمې هېوادونه، چین او ایران په ځانګړي ډول هندوستان باید په دې برخه کې مرسته وکړي.
قریشي دغه راز ویلي، افغان جګړه پوځي حل نه لري او لازمه ده چې سیاسي حللاره ورته ولټول شي.
له دې وړاندې د ناټو عمومي منشي ینس سټولټنبرګ هم په افغانستان کې د سولې لپاره د امریکا د پیل کړو هڅو د ملاتړ ترڅنګ، د سیمې له هېوادونو غوښتنه وکړه چې د افغان حکومت په مشرۍ د سولې له پروسې سره مرسته وکړي.
له دې سره جوخت، ټاکل شوې چې د پاکستان د بهرنیو چارو وزیر شاه محمود قریشي راتلونکې اونۍ د افغانستان او پاکستان د اړیکو د ښه کېدو او د افغان سولې په تړاو د خبرو لپاره کابل ته سفر وکړي.
پاکستاني رسنیو د یکشنبې په ورځ وویل چې قریشي د امریکا د هغو هلو ځلو په لړ کې افغانستان ته سفر کوي چې په افغانستان کې یې د سولې او ثبات د ټینګښت لپاره د پاکستان د همکارۍ د جلبولو په خاطر کوي.
په ورته وخت کې د ولسي جرګې د بهرنیو اړیکو د کمېسیون غړي که څه هم د افغانستان د سولې په پروسه کې لا هم د پاکستان همکاریو ته د شک په سترګه ګوري، خو وايي په دې برخه کې د هندوستان رول مهم دی.
د دغه کمېسیون غړې ارین یون ازادي راډيو ته وویل: «د سیمې ټول هغه هېوادونه چې د افغانستان د سولې په برخه کې مرسته کوي، نو د افغانستان ولسونه به په دې برخه کې هېڅ هېواد ته رد ځواب ورنه کړي او هرکلی به يې وکړي، نو هند هم یو له هغو هېوادونو دی چې له افغانستان سره يې هر وخت مرسته کړې، که د سولې په برخه کې هم مرسته وکړي، نو پایلې به يې ښې وي.»
دغه څرګندونې په داسې حال کې کېږي چې په دې وروستیو کې د افغان سولې په تړاو تر بل هر وخت هلې ځلې چټکې شوې دي.
د افغان سولې لپاره د متحده ایالتونو د بهرنیو چارو وزارت ځانګړي استازي زلمي خلیلزاد د سیمې هېوادونو ته درېیم سفر او له بېلابېلو چارواکو سره یې ليده کاته هغه څه دي چې سولې ته د رسېدو په موخه يې د افغانانو هیلې زیاتې کړې دي.
