د ولسمشر د فرمان له مخې د سولې پروسې د عالي مشورتي بورډ او د سولې خبرو اترو د ټيم غړي وټاکل شول.
دغه څرګندونې په هغې خبرپاڼې کې شوې چې د ملي امنيت شورا له خوا تېره ورځ رسنيو ته لېږل شوې ده.
په فرمان کې راغلي چې د سولې بهیر د عالي مشورتي بورډ او د حکومت د خبرو اترو ټیم، د تل پاتې سولې د ټینګښت لپاره د ملي هوکړې رامنځته کېدو په موخه له جهادي، سیاسي مشرانو او د ټولنې له بېلابېلو اقشارو سره له مشورو او بحثونو وروسته جوړ شوى دى.
دغه بورډ چې د ولسمشر تر مشرې لاندې جوړشوی مسوولیت لري، څو د افغانستان د دولت په مشرۍ د سولې بهیر لپاره اساسي مشورې وړاندې کړي، د سولې بهیر د کاري کمېټو وړاندیزونه وڅېړي، د اړتیا په صورت کې د افغانستان د اسلامي جمهوریت د خبرو اترو ټیم لپاره اجنډا او ګټور چوکاټ وړاندې کړي، د سولې د مذاکراتو پر تحقق نظارت وکړي، د عالي بورډ په جلسه کې د ملي یووالي حکومت مشرتابه، د ملي شورا د مجلسینو رییسان، قاضي القضات، د ملي امنیت سلاکار، د جمهوري ریاست مقام د دفتر عمومي رییس، لوی څارنوال، د ملي امنیت عمومي رییس، په پارلماني چارو کې د دولت وزیر، د سیمه ییزو ارګانونو د خپلواکې ادارې مشر، د افغانستان د علماوو شورا مشر او د سولې عالي شورا د دارالانشا مشر ګډون کوي.
د دغه فرمان له مخې په پارلماني چارو کې د دولت وزیر موظف دی چې د جلسې د جوړېدو او د سولې عالي مشورتي بورډ له غړو سره د همغږۍ مسوولیت پر غاړه ولري.
د سولې عالي مشورتي بورډ جلسې په میاشتنۍ او یا هم د اړتیا په صورت کې په فوق العاده ډول ترسره کېږي.
د يادونې وړ ده چې په دې وروستيو کې د سولې په برخه کې د امريکا ځانګړي استازي زلمي خليلزاد په افغانستان کې د سولې د راوستو په موخه د طالبانو تر څنګ له ګاونډيو او نورو هېوادونو له مشرانو سره ليدنو کتنو ته دوام ورکړی.
