رباني درې اړخیزې غونډې ته: له پاکستانه د افغانستان یوازینۍ غوښتنه په سوله کې لازمه همکاري ده

د بهرنیو چارو وزیر صلاح الدین رباني د افغانستان، چین او پاکستان درې اړخیزې غونډې ته په خبرو کې ویلي چې له پاکستانه د افغانستان یوازینۍ غوښتنه په افغان سوله کې همکاري ده. نوموړي زیاته کړه پاکستان په وار وار په افغان سوله کې د همکارۍ خبره کړې خو تر اوسه یې په دې برخه کې لازمه همکاري نه ده کړې. رباني وویل، سوله د افغانانو لومړۍ او اساسي غوښتنه ده او پاکستان نه په جدي توګه غواړي چې په دې برخه کې خپل رول په سمه توګه ادا کړي. په ورته وخت کې د پاکستان د بهرنیو چارو وزیر شاه محمود قریشي د دې پوښتنې په ځواب کې چې دوی به په دې برخه کې لازمه همکاري وکړي او کنه وویل، پاکستان په وار وار ویلي چې دوی چمتو دي له افغان حکومت سره سولې ته د رسېدو په برخه کې لازمه مرسته وکړي او پاکستان دې کار ته په پوره ډول چمتو دی. قریشي په پاکستان کې د ترهګرو د پټنځایونو په اړه وویل چې پاکستان له ترهګرۍ سره د مبارزې په برخه کې قربانۍ ورکړې دي او یادو قربانیو ته په کتو به دوی هیڅکله په خپله خاوره کې ترهګرو ته ځای ورنه کړي. هغه زیاته کړې افغانستان کې سوله د پاکستان او سیمې په ګټه ده او دوی چمتو دي د یو ښه ګاونډي رول په پوره صداقت سره ترسره کړي. په دې ناسته کې د ترهګرۍ پر ضد پر ګډې مبارزې يو تړون لاسليک شوی او دغه راز له طالبانو سره د خبرو پر څرنګوالي هم خبرې اترې شوې دي.