د پاکستان لومړي وزير عمران خان ويلي، د افغان طالبانو او امريکا ترمنځ يې د سولې خبرو ته لاره هواره کړې ده.
نوموړي په پېښور کې يوې غونډې ته په وینا کې وویل چې د دوى په هڅو به د راتلونکې دوشنبې په ورځ(سبا) د طالبانو او امريکا ترمنځ پرېکنده مخامخ خبرې وشي.
نوموړي دغه خبرې اترې او پرمختګ د خپل حکومت لويه لاسته راوړنه بللې او پر دې خبرو اترو يې خوښي څرګنده کړې ده.
عمران خان ويلي، پخوا به امريکا له پاکستانه د طالبانو پرضد د جدي اقداماتو غوښتنې کولې، خو اوس له دوى غواړي چې د امريکا او طالبانو ترمنځ د سولې خبرو ته زمينه برابره کړي.
نوموړي په دې اړه وویل: «زه تل دا وايم چې د افغان شخړې هواری د خبرو اترو له لارې ممکن دى».
د عمران خان په وينا، که چېرې په افغانستان کې سوله او ثبات وي، نو پېښور به د مرکزي اسيا لپاره د سوداګرۍ پر مرکز بدل شي.
هغه وايي، هغه مهال چې امريکا په افغانستان کې خپلو عملياتو ته زور ورکړى و، ده ورته د سولې د خبرو اترو غږ وکړ، اوس چې امريکا سوله غواړي، نو دی د دغه دريځ ملاتړی دى.
د نوموړي په وينا، سبا به د طالبانو او امريکا ترمنځ کېدونکې خبرې اترې پرېکنده او پايلې لرونکې وي.
د افغان سولې لپاره د امريکا ځانګړي استازي تر دې مخکې دوه ځلې له طالب استازو سره په قطر کې خبرې اترې کړې دي.
خلیلزاد چې د افغان سولې په اړه په درېيم سفر راوتلى، تر اوسه یې پاکستان، افغانستان، ترکمنستان، ازبکستان او بلجيم ته سفرونه کړي دي.
ټاکل شوې چې نوموړى قطر او متحده عربي اماراتو ته هم ولاړ شي.
بلخوا ځينو سرچينو خبر ورکړى چې پاکستان خليلزاد ته ويلي چې اسلام اباد غواړي د طالبانو او امريکا ترمنځ د خبرو اترو کوربهتوب وکړي.
عرب نيوز ورځپاڼې د خپلو سرچینو په حواله لیکلي، پاکستاني چارواکو دغه خبرې له زلمي خلیلزاد سره په وروستۍ لیدنه کې کړې دي.
عرب نیوز لیکلي، پاکستان غواړي د افغان حکومت او طالبانو ترمنځ د سولې په برخه کې همکاري وکړي. د دغه هېواد په بهرنیو چارو وزارت کې یوې سرچینې عرب نیوز ته ویلي، دوی د زلمي خلیلزاد له لارې خپل پیغام واشنګټن ته رسولی، خو تر اوسه یې ځواب نه دی ترلاسه کړی.
