کابل پرون د افغانستان، پاکستان او چین ترمنځ د درې اړخیزې ناستې کوربه و. په دې ناسته کې چې د یادو هېوادونو د بهرنیو چارو وزیرانو ګډون کړی و، د افغانستان او پاکستان ترمنځ د اړیکو پر ښه کېدو، د سیمه ییز همکارۍ پر پراخېدو او سولې په اړه خبرې وشوې.
له ناستې وروسته د چین د بهرنیو چارو وزیر وانګ یي مطبوعاتي کنفرانس ته وویل چې افغان جګړه نظامي حل نه لري، نو اړینه ده چې د سولې او خبرو اترو له لارې یې حل وموندل شي.
نوموړي زیاته کړه، چین د سولې په اړه د افغانستان او پاکستان د «عمل ګډ پلان» او همدارنګه هغه هڅې چې سولې ته زمینه برابره کړي، دوی یې ملاتړ کوي.
د چین د بهرنیو چارو وزیر همدارنګه وویل، سوله د افغانانو اړوند ده او د افغانانو په مشرۍ او حاکمیت باید ورته احترام وشي او دغه بهیر باید په عمل کې د افغانانو په مشرۍ ترسره شي.
وانګ يي وویل: «موږ له طالبانو غواړو چې د سولې له دغه وړاندیز سره یو ځای شي. تر هرڅه ژر باید د سولې بهیر ته مخ را واړوي، څو ټول پر دې متحد و اوسو چې متقابل باور رامنځته کړو.»
د پاکستان د بهرنیو چارو وزیر شاه محمود قریشي هم د دغه مطبوعاتي کنفرانس پر مهال وویل، د افغان جګړې ټولې ښکېلې غاړې دې ته هڅوي، څو په خپل منځ کې سوله وکړي. نوموړي زیاته کړه، هېواد یې په دې برخه کې خپل رغنده رول لوبوي او د سولې خبرو د مخ ته وړلو لپاره خپلې هڅې کوي.
قریشي وویل: «دا یو افغاني تصمیم دی، تاسو «افغانان» باید دغه تصمیم ونیسی چې تاسو د خپل راتلونکي لپاره څه غواړی، تاسو دا تصمیم نیسی چې کله او څنګه دغه تصمیم نیسی. موږ «پاکستان» تاسو ته په دې برخه کې اوږه درکوو.»
پر پاکستان له ډېره وخته دا تورونه دي چې په خپله خاوره کې یې طالب مشرانو ته پټنځایونه ورکړي او د افغان سولې په برخه کې یې همکاري نه ده کړې.
د پاکستان د بهرنیو چارو وزیر د دې پوښتنې په ځواب کې چې دوی به د افغان سولې په دې برخه کې لازمه همکاري وکړي او کنه؟ وویل، پاکستان په وار وار ویلي چې دوی چمتو دي، څو له افغان حکومت سره سولې ته د رسېدو په برخه کې لازمه مرسته وکړي او دوی دغه کار ته په پوره ډول چمتو دي. نوموړي په پاکستان کې د ترهګرو د پټنځایونو په اړه وویل، پاکستان له ترهګرۍ سره د مبارزې په برخه کې قربانۍ ورکړې دي او دغو قربانیو ته په کتو به دوی هېڅکله په خپله خاوره کې ترهګرو ته ځای ورنه کړي.
هغه زیاته کړه، په افغانستان کې سوله د پاکستان او سیمې په ګټه ده او دوی چمتو دي چې د یو ښه ګاونډي رول په پوره صداقت سره ترسره کړي.
دغه مطبوعاتي کنفرانس ته د افغانستان د بهرنیو چارو وزیر وویل چې په دغه درې اړخیزه ناسته کې له امنیت او ترورېزم سره پر مبارزې، اقتصادي پراختیا او سیاسي باور او سولې خبرې وشوې.
صلاح الدین رباني وویل، په دې ناسته کې یې له پاکستان څخه وغوښتل چې د افغانستان د سولې له بهیر سره مرسته وکړي.
هغه زیاته کړه: «موږ په وار وار ویلي چې په افغانستان کې سوله او امنیت په سیمه کې د سولې او امنیت په معنا دی. په افغانستان کې سوله او امنیت په پاکستان کې د سولې په معنا دی، اوس یې وخت رسېدلی چې پاکستان د عملي ګامونو په پورته کولو سره وښيي چې په رښتیا هغه څه چې وايي، همداسې ده که نه.”
د یادونې ده چې دغه ناسته کې د افغانستان او پاکستان ترمنځ له افغان سولې سره د همکارۍ او ترورېزم سره د مبارزې تړون هم لاسلیک شو.
