وسله والو کسانو په مالي کې ۲۴ ملکي وګړي وژلي دي

د مالي هېواد په شمالي ښار ګایو کې پر ځینې کلیو د وسله والو کسانو په برید کې ۲۴ کسان وژل شوي دي. فرانسې خبري اژانس د یادې سیمې د چارواکو له قوله ویلي چې د پېښې له ځایه یې ۲۴ مړي او ۱۲ ټپیان روغتون ته لېږدولي دي. چارواکو څرګنده کړې ده چې دا برید د ترهګرو کار دی. د راپورونو له مخې، په مالي کې په تېرو دریېو میاشتو کې شاوخوا ۵۰۰ کسان وژل شوي دي. د یادونې ده چې درې میاشتې وړاندې د مالي هېواد حکومت وروسته تر هغه سقوط وکړ چې د بشري حقونو د تامین برخه کې یې ورتر غاړې مسوولیت ادا نه کړ، هغه مهال هم په القاعده او داعش پورې تړلو ډلو پر ملکي او نظامي هدفونو د بریدونو مسوولیت منل خو اوس تازه راپورونه وایي چې په دغه هېواد کې ملکي مرګ ژوبله درې برابره ډېره شوې ده.