پاکستانی شنونکی: امریکا افغان جګړه بایللې ده

په پاکستان کې د سیمه ییزو چارو نامتو شنونکی محمد عبدالله ګل وایي، امریکا د افغانستان په جګړه کې ماتې خوړلې او اوس غواړي خپل سرتېري په فاتحانه شکل له افغانستانه وباسي. هغه ایرنا خبري اژانس سره په خبرو کې ویلي، امریکا په افغانستان کې د سولې په هڅه کې نه ده، بلکې نور نه غواړي په دغه هېواد کې پر روانه جګړه په میلیاردونو ډالر ولګوي. عبدالله ګل وایي، په پیل کې د امریکا پالیسي دا وه چې طالبان د ترهګرو په لیست کې شامل او له دوی سره جګړه وکړي، خو کله چې پوه شول دې ډلې ته ماتې نه شي ورکولی، نو یې د سولې په نوم ډرامه پیل کړه. هغه ویلي، له دې ډرامې د امریکا موخه دا ده چې غواړي خپل سرتېري له افغانستانه وباسي، نه دا چې دوی په دې خاوره کې امن راولي. یاد شنونکي زیاته کړې، امریکا به له دې وروسته هم په افغانستان کې جګړه دوامداره وساتي، ځکه د هغه په باور د امریکا ګټې په جګړه کې خوندي دي. عبدالله ګل په خپلو خبرو کې ویلي، ټول په دې پوهېږي چې د داعش ډلې ملاتړي څوک دي او دې خاورې ته له کوم لوري دننه شوي دي. هغه د خپلو خبرو پر دوام وویل، اوس افغانانو ته په کار ده چې له دې ډلې وغواړي څو په خپله خاوره کې د وژل شویو کسانو پور ورکړي. دا په داسې حال کې ده چې همدا نن ورځ امریکایي پلاوی په دوبۍ کې له وسله والو طالبانو سره په خبرو بوخت خو تر اوسه یې جزیات نه دي خپاره شوي.