د سولې مشورتي بورډ طالبانو سره پر مخامخ خبرو ټینګار کړی

ولسمشر غني نن وروسته له غرمې د سولې مشورتي بورډ سره په چهار چنار ماڼۍ کې لیدلي دي. له ارګه د خپرې شوې خبرپاڼې له مخې په دې لیدنه کې ولسمشر غني د یاد بورډ له غړو سره د هغوی د دندو او دغه راز د یاد بورډ د پراختیا په اړه خبرې اترې او مشورې کړې دي. سرچینه کاږي چې د سولې مشورتې بورډ غړو د افغان دولت له لارې طالبانو سره پر مذاکرې ټینګار کړی او ویلي یې دي، د هېواد د اساسي قانون له مخې د مذاکرې صلاحیت د حکومت دی، نه د سیاسي ګوندونو. دا بورډ خپله ناسته په داسې حال کې کوي چې نن په دوبۍ کې د امریکایي پلاوي او طالب استازو تر منځ خبرې روانې دي. د یادونې ده چې د افغان سولې لپاره د امریکا ځانګړي استازي زلمي خلیلزاد د سیمې هېوادونو ته د خپل دویم سفر پر مهال پر افغان حکومت او طالبانو غږ کړی وو چې د سولې خبرو د پیل لپاره دې خپل با صلاحیته پلاوی وټاکي.