د حکومت د سولې مشورتي بورډ په لومړنۍ ناسته کې چې د ولسمشر غني په مشرۍ پرون شوې وه، د اکثریت ګوندونو مشرانو او مشهورو سیاسي څېرو ګډون نه و کړی.
د سیاسي احزابو کمېټه وایي، چې دوی له طالبانو سره د سیاسي ګوندونو مرکچي پلاوي پر ترکیب کار کوي او ډېر ژر به اعلان شي.
له طالبانو سره د مرکچي هیئت د ټاکلو په تړاو د ګلبدین حکمتیار تر څرګندونو وروسته د جمعیت اسلامي، حزب اسلامي او وحدت اسلامي ګوندونو استازي وایي، د بین الافغاني مذاکراتو لپاره یوازینۍ لار د سیاسي احزابو له لارې د مذاکراتو پرمخ وړل دي او یوازې احزاب کولای شي چې د طالبانو باور ترلاسه کړي.
په ولسمشرۍ ماڼۍ کې د حکومت د سولې عالي مشورتي بورډ لومړنۍ ناسته کې ویل شوي چې له طالبانو سره به مذاکرات یوازې حکومت ترسره کوي، نه سیاسي احزاب.
د سیاسي ګوندونو استازي فیض الله ساپی، اسدالله سعادتي او عبدالودود پیمان کابل نیوز ته وویل، چې د سیاسي احزابو کمېټې چې د ۲۷ ګوندونو له استازو تشکیل شوې او د هېواد اووه مطرح سیاسي ګوندونه یې رهبري کوي، له طالبانو سره د مذاکراتو لپاره پر مرکچي پلاوي هم بحث کړی.
د سولې عالي شورا غړی عبدالحکیم مجاهد په دې پروسه کې د سیاسي ګوندونو پر رول ټینګار کوي او وایي، د هرې هغې هڅې ملاتړ کوي چې افغانان سولې ته ورسوي.
خو ظاهراً د ملي یوالي حکومت مسوولان د سیاسي احزابو له لارې له طالبانو سره پر مذاکراتو ناخوښه دي او د سولې عالي مشورتي بورډ په لومړنۍ ناسته کې پریکړه شوې چې د مذاکراتو د پرمخ وړلو صلاحیت د سیاسي احزابو نه، بلکې د حکومت دنده ده.
شنونکي وايي، له طالبانو سره د مستقل افغاني پلاوي د ټاکل کېدو طرحه د سیاسي احزابو او حکومت د اقداماتو له امله بې ارزښته شوې او ښايي دا ډله هم له دغسې پلاویو سره د خبرو اترو پرځای، له افرادو سره پر ناستو تمرکز وکړي.
