عمران خان: د طالبانو او امریکا ترمنځ خبرو ته هیله من یو

پاکستان وایي دوی د طالبانو او امریکا ترمنځ روانو خبرو ته هیله من دي. د پاکستان لومړي وزیر عمران خان ویلي چې دوی د اماراتو په غونډه کې حضور لري او ددغه غونډې په جوړولو کې یې همکاري کړې ده. هغه ویلي هیله لري چې د همدې خبرو او مذاکراتو په پایله کې به په افغانستان کې د درېیو لسیزو روان بحران ختم شي او افغانان به له سولې او امنیت برخمن شي. د پاکستان لومړي وزیر ویلي چې پاکستان د سولې په برخه کې هر ډول همکارۍ ته تیار دی او هڅه کوي د افغانستان جګړه د خبرو له لارې حل شي. پاکستان تر هغه وروسته د سولې په برخه کې جدي غبرګونونه ښيي چې ډونالډ ټرمپ ددغه هېواد لومړي وزیر عمران خان ته یو لیک واستاوه. په دې لیک کې له پاکستان غوښتل شوي وو، چې نور دې په رښتینې او عملي توګه د افغانستان د سولې په مسئله کې ګامونه اوچت کړي.