په متحده عربي اماراتو کې د افغان سولې په تړاو په دویمه ورځ هم طالب استازو له امریکايي پلاوي سره اوږده بحثونه کړي دي. طالبان استازو د خپلو بندیانو د خوشې کولو، له تور لېست څخه د دوی د مشرانو د نومونو پر ایستلو، د قطر دفتر په رسمي کېدو او د بهرنیو ځواکونو پر وتلو ټینګار کړی دی. امریکايي پلاوي بیا له طالبانو غوښتي چې له افغان حکومت سره خبرې وکړي، اوربند ته غاړه کېږدي او دغه راز په افغانستان کې امریکايي اډې ومني. په دغه غونډه کې د ځینو پرمختګونو خبرونه ورکول کېږي، خو پوره څوک نه پوهېږي چې څه پرمختګ شوی دی.
د خبرو په لومړۍ ورځ سعودي، متحده عربي اماراتو او پاکستان د امریکا په غوښتنه له طالبانو وغوښتل چې له افغان حکومت سره خبرو ته حاضر شي، خو طالبانو په خپل دریځ ټینګار کاوه. په دویمه ورځ خلیلزاد له طالبانو سره په خبرو کې د هغوی غوښتنې واورېدلې. خلیلزاد ومنله چې طالب مشران باید له تور لېسته و ایستل شي، خو د دې لپاره باید افغان دولت په رسمي ډول له ملګرو ملتونو غوښتنه وکړي، نو ځکه طالبان باید له حکومت سره خبرې وکړي. دغه راز خلیلزاد وویل چې دوی مني چې باید طالب بندیان له بنده خوشې شي، خو دا بندیان له حکومت سره دي او پکار ده چې طالبان له حکومت سره خبرې وکړي. خلیلزاد د طالبانو د دفتر له رسمې کېدو سره هم توافق ښودلی، خو ویلي یې دي چې د افغان حکومت له موافقې پرته دفتر ناشونی دی، نو پکار ده چې له افغان دولت سره خبرې وشي. په دوو ورځو کې پر طالبانو له دې امله ډېر فشار و چې له افغان حکومت سره خبرې وکړي. په دویمه ورځ طالبانو منلې چې له حکومت سره به مشروطې خبرې کوي. د دې لپاره ویل شوي چې د بهرنیو ځواکونو مهالوېش باید اعلان شي. طالبانو دغه راز د موقت حکومت خبره هم کړې ده، خو امریکا بیا پر شپږ میاشتني اوربند خبرې کړې دي.
که څه هم د ښکېلو لورو ترمنځ واټن زیات دی، خو ښکاري چې ټول لوري له فشار سره مخ دي او باید توافق وکړي. دا ځل په خبرو کې یو بل مثبت ټکی دا هم دی چې خبرو ته یوازې د قطر دفتر غړي نه، بلکې د طالبانو د رهبرۍ شورا یا کوټې شورا استازي هم ورغلي دي. دا هغه څه دي چې له جوړجاړي سره مخامخ مرسته کوي.
داسې ښکاري چې د سولې خبرې به نورې هم دوام کوي او پکې به مهم پرمختګونه وشي. که د بهرنیو ځواکونو د وتلو مسئله حل شي، نو دا بیا اسانه ده چې طالبان له حکومت سره خبرې ومني. له تور لېسته د نومونو ایستل، د بندیانو خلاصون او د سولې د خبرو لپاره د دفتر رسمي کول ستونزمن کارونه نه دي. په دې چاره کې ان موقت حکومت هم ستونزمن نه دی، ځکه چې په کور دننه د حکومت وخت هم پوره کېږي او خلک د سولې لپاره د موقت حکومت منلو ته تیار دي. له همدې امله پکار ده چې هر لوری د سولې لپاره له خپلو ډېرو غوښتنو تېر شي، قرباني ورکړي او په دې سره به موږ له اوږدې جګړې وروسته د سولې خاوندان شو.
