اروپايي ټولنه وايي، د افغان سولې لپاره د زلمي خلیلزاد هڅې مثبت لور ته روانې دي چې پایله به یې په افغانستان کې د سولې ټینګښت وي.
په داسې حال کې چې امریکا په دې وروستیو کې د افغان جګړې د حل لپاره د خپلو هڅو د دوام خبره کوي، اروپايي ټولنه وايي چې روانې هڅې به په افغانستان کې د سولې ټینګښت ته لار هواره کړي.
په افغانستان کې د دې ټولنې استازي پيري میاودون له ازادي راډيو سره په ځانګړې مرکه کې وویل چې د سولې د روانو هڅو په لړ کې ښه خبره دا ده چې سولې ته د رسېدو په لار کې له دواړو خواوو مثبت حرکتونه لیدل کېږي.
نوموړي وویل: «مهمه خبره دا ده چې موږ څنګه کولای شو چې هغوی د سولې خبرو ته وهڅوو. زما په اند د سولې لپاره انګېزه او حرکت شته. له دواړو طرفونو د سولې لپاره لېوالتیا ليدل کېږي، نو زه فکر کوم چې دغه فرصتونه به د افغانستان د خلکو لپاره سوله راوړي.»
میاودون دغه راز وویل، اروپایي اتحادیه به له افغانستان سره د سولې او ثبات په برخه کې خپلو هڅو ته دوام ورکړي.
د نوموړي په خبره، د افغانستان په قضیه کې ښکېل هېوادونه او ټولې خواوې اوس دې نتیجې ته رسېدلې چې د دغه هېواد د جګړې سوله ییز حل او باثباته افغانستان يې په ګټه دی او په دغه هېواد کې باید نوره جګړه پای ته ورسېږي.
دا په داسې حال کې ده چې امریکايي چارواکو د دوشنبې له ورځې راهیسې په متحده عربي اماراتو کې له طالب استازو سره په خبرو بوخت دي. د امریکا د بهرنیو چارو وزارت يوه ویاند ویلي چې په ابوظبۍ کې دغه خبرې د هغو هڅو يوه برخه ده چې موخه یې په افغانستان کې د جګړې پای ته رسولو لپاره د افغانانو ترمنځ خبرو ته زمینه برابرول دي.
بلخوا د طالبانو ویاند ذبیح الله مجاهد رسنیو ته په رالېږلې اعلامیه کې ویلي، د دې ډلې د سیاسي دفتر غړي او امریکايي لوري ترمنځ په متحده عربي اماراتو کې مذاکرات کېږي چې درې ورځې به دوام وکړي.
په اعلامیه کې دا هم راغلي چې په دې غونډه کې د پاکستان، متحده عربي اماراتو او سعودي عربستان استازو هم ګډون کړی.
په ورته وخت کې د سیاسي چارو کار پوه شهزاده مسعود که څه هم د سولې روانې هڅې مثبتې ګڼي، خو وايي چې په دغه بهیر کې افغانان باید په حاشیه کې پاتې نه شي.
نوموړی وایي: «ځينې اندېښنې هم شته، هغه دا چې داسې ونه شي چې افغانان په حاشیه کې پاتې شي او د پردې شاته د ځينو ګاونډیانو سره پټې معاملې وشي چې هغه به بیا هېڅ افغان ته هم د منلو نه وي. کوښښ باید دا وشي چې د سیمې هېوادونه په خپلو منځو کې يوې اجماع ته ورسېږي او بالاخره افغانان هم دې ته چمتو شي چې د بینالافغاني مذاکراتو له لارې خپل تصمیم په خپله ونیسي.»
