په اماراتو کې د طالب استازو او زلمي خلیلزاد ترمنځ د مخامخ خبرو د لومړۍ ورځې په لیدنه کې د امریکايي هیئت او طالبانو ترمنځ پر اوربند، موقتې ادارې او له افغانستانه د بهرنیو ځواکونو پر وتلو خبرې شوي.
طالبانو ته نږدې سرچینو رويټرز خبري اژانس ته ویلي چې د زلمي خلیلزاد په مشرۍ امریکايي هیئت د مذاکراتو په لومړۍ ورځ چې د سعودي، پاکستان او اماراتو استازو هم حضور درلود، له طالب استازو غوښتي، څو شپږ میاشتنی اوربند وکړي او د موقتې ادارې جوړېدو لپاره د خپلو کسانو نومونه ورکړي.
سرچینه وايي چې طالبانو د پاکستان، سعودي او اماراتو په ضمانت په مشروط ډول اوربند ته چمتووالی ښودلی او ویلي دي چې که د موقتې ادارې مشري د دوی په خوښه کس ته ورکول کېږي، دوی شپږ میاشتني اوربند ته حاضر دي.
رویټرز د طالبانو د یوه استازې له خولې لیکلي: «امریکا په شپږ میاشتني اوربند او په دې ټینګار کوي چې موږ د موقتې ادارې لپاره خپل استازي ور معرفي کړو. که سعودي عربستان، متحد عربي امارات او پاکستان تضمین وکړي او د موقتې ادارې د مشرۍ لپاره له هغو کسانو څوک وټاکل شي چې موږ وړاندیز کړي دي، موږ چمتو یو چې په اوربند فکر وکړو. »
د سیاسي چارو شنونکی نظر محمد مطئمن وایي: « په لومړۍ ورځ یوازې مقدماتي لیدنه شوې وه، نورو ټولو هېوادونو له طالبانو وغوښتل چې له افغان حکومت سره خبرې وکړي، نن(پرون) به د طالبانو له خوا وړاندیزونه دا وي چې په تور لېست به خبرې وشي، د بندیانو په خلاصون او سهولتونو به خبرې وشي. همدارنګه د طالبانو لپاره په کوم هېواد کې د کوم دفتر په پانیستلو به خبرې وشي. خو د امریکایانو له خوا به وړاندیز دا وي چې په اوربند باندې خبرې وشي او له طالبانو سره د امریکایي پوهنتون د استادانو دخلاصون خبره وشي او طالبان به له افغان حکومت سره مخامخ خبرو ته وهڅوي.»
ولسمشرۍ ماڼۍ او د حکومت اجرائیه ریاست وایي چې د عبدالسلام رحیمي په مشرۍ هیئت اوسمهال په اماراتو کې دی، د امریکا له ځانګړي استازي زلمي خلیلزاد سره یې کتلي او هڅه کوي چې د طالبانو له استازو سره وګوري.
د اجرائیه ریاست د ویاند مرستیال فریدون خوځون وویل: « د افغان حکومت مذاکراتي ټیم ابوظبۍ ته رسېدلی دی او هلته یې له مختلفو لورو سره لیدلي دي، خلیلزاد هم د دې هڅه کوي چې د افغان حکومت او طالبانو ترمنځ خبرو ته زمینه برابره کړي».
بلخوا په افغانستان د ملګرو ملتونو ځانګړي استازي هم له طالبانو سره د مخامخ خبرو لپاره خوشبیني ښودلې او ویلي یې دي چې اوس تر هر بل وخت څخه د سولې فضا برابره شوې ده.
نوموړي ویلي: « بل مهم ګام دا دی، څو د افغان حکومت او طالبانو استازي سره وګوري، یا حد اقل په رسمي توګه داسې څه ترسره شي، چې خبرو اترو ته زمینه برابره کړي».
د مؤقتې ادارې د جوړېدو او شپږ میاشتني اوربند په تړاو په اماراتو کې د طالبانو د استازو او امریکايي هیئت ترمنځ مذاکرات داسې مهال دي، چې ټاکل شوې د اماراتو ناسته نن هم دوام وکړي، خو طالبانو ویلي، چې د ملي یووالي حکومت له استازو سره به ونه ګوري.
