د آریانا افغان هوایي شرکت: ژر به د کابل ارومچي تر منځ الوتنې پیل شي

د اریانا افغان دولتي هوایي شرکت وایي چې ډېر ژر به په مستقیم ډول د افغانستان او چین تر منځ الوتنې بیا پیل شي. له هغه وروسته چې چین هېواد د روانې میلادي میاشتې په لومړۍ نېټه افغانانو ته د ویزو ورکړه پیل کړه اوس اریانا افغان هوایي شرکت اعلان کړی دی، چې ژر به د کابل- ارومچي ترمنځ الوتنې بیا پیل کړي. بلخوا د افغانستان د سوداګرۍ خونه وايي، چې د چین هیواد له لوري افغان سوداګرو ته د ویزو د ورکړې د بهیر په بیا پیل کیدو سره به د افغانستان او چین ترمنځ سوداګري یو ځل بیا پراخه او ګړندۍ شي. د افغانستان د سوداګرۍ خونې مرستیال یونس مومند وایي، چې په کابل کې د چین سفارت له لوري هغه سوداګرو ته د ویزو ورکړه پیل شوې، چې دوی یې مخې له مخکې ورته لېست سپارلی و. مومند وایي، چین هیواد دغه راز د افغانستان له سرپرست حکومت سره ژمنه کړې، چې له افغانستان څخه چین ته پر صادرېدونکو توکو به ۹۸ سلنه مالیه هم معاف کړل شي.