کریم خلیلي: حکومت او سیاسي ګوندونه باید د سولې په برخه کې سره همغږي شي

د سولې عالي شورا مشر کریم خلیلي نن د سولې عالي شورا د دارالانشا د رییس په توګه د عمر داوودزي د معرفي په غونډه کې د خبرو پر مهال وویل، افغانان سولې ته نږدې شوي دي او دا تمه شته چې جګړه به پای ته ورسېږي. د کریم خلیلي په وینا د طالبانو او امریکا ترمنځ خبرې روانې دي او ددې تمه شته چې ژر به له افغان حکومت سره هم د طالبانو خبرې پیل شي. نوموړي هغه نیوکې بې ځایه وبللې چې ګواکي د سولې عالي شورا لاس ته راوړنې نه لري. دده په خبره د سولې عالي شورا د سولې لپاره پراخې هڅې کړې دي چې ځينې مسایل یې رسنیز کولی نه شي. هغه پر ټولو اړخونو غږ وکړ چې د سولې په اړه هېڅ ډول اختلافات رامنځ ته نه کړي بلکې سوله د ټولو په ګټه ده او واحد دريځ ته اړتیا ده. کریم خلیلي همدا راز وویل، چې دوی سولې ته ژمن دي او د سولې عالي شورا تر خپلې وسې پورې هڅه کوي چې روانه جګړه پای ته ورسېږي.