خلیلزاد: ابوظبۍ غونډه کې مو طالبانو سره خبرې ګټورې وې

د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد په ابوظبۍ کې له طالب استازي سره تر خبرو وروسته پر خپل ټویټر لیکلي چې یاده غونډه کې یې له طالب استازي سره په افغانستان کې د روان بحران د پای ته رسولو په اړه ګټورې خبرې کړې دي. نوموړي که څه هم په دې اړه نور جزیات نه دي ورکړي خو ویلي یې دي چې د بین لافغاني دیالوګ د هڅونې لپاره دا خبرې خورا جوړونکې وې. په ورته وخت کې د طالبانو ویاند ذبیح الله مجاهد له لوري رسنیو ته په رالېږل شوې اعلامیه کې ویل شوي چې دوی په یاده غونډه کې له افغانستان د بهرنیو ځواکونو پر وتلو، د طالب بندیانو پر خلاصون او نورو لومړنیو مسایلو خبرې کړې دي. اعلامیه کې دغه راز راغلي چې د اوربند، راتلونکو ټاکنو، موقت حکومت، او له افغان پلاوي سره د طالب استازي د خبرو په اړه د دوی دریځ لا له پخوا څرګند وو او په دې تړاو یې هیڅ خبرې نه دي کړې. ویل کېږي چې د دې غونډو بل پړاو به په سعودي عربستان کې ترسره شي.