اماراتو کې د طالب او امريکايي استازو ناسته پايته ورسيده

دغه غونډه چې نن او پرون په ابوظبۍ کې ترسره شوه د طالبانو، سعودي عربستان، متحده عربي اماراتو، پاکستان او امريکا استازو په کې ګډون وکړ او د افغانستان د قضيې د حل په موخه په کې خبرې وشوې.
د طالبانو له لوري په خپره شوې خبر پاڼه کې راغلي چې د متحده عربي اماراتو په غونډه کې زيات ټينګار له افغانستان څخه د بهرنيو ځواکونو په وتلو و او ددې ترڅنګ طالبانو د غونډې برخه والو ته په افغانستان کې د بهرنيو ځواکونو په هوايي بريدونو کې د ملکي تلفاتو په اړه شواهد او معلومات وړاندې کړل او د ژر بندېدو غوښتنه يې وکړه.
همداراز په غونډه کې د طالب زندانيانو د خلاصون او له هغوی سره په زندانونو کې د انساني چلند غوښتنه وشوه.
خبر پاڼه کې راغلي دي چې په دې غونډه کې د اوربند، د کابل له حکومت سره د مذاکراتو ، مؤقت حکومت، ټاکنو او نورو کورنيو مسئلو په اړه خبرې ونشوې او دا په دې غونډه کې له لومړي سره د طالبانو دريځ و.
طالبانو ويلي دي چې په افغانستان کې لومړۍ مهمه او اساسي مسئله د بهرنیو د نيواک دی چې په وينا يې د افغانستان د ټولو مشکلاتو بنياد او لوی خنډ د بهرنيو نظامي يرغل دی.
په دې غونډه کې په دې هم خبرې وشوې چې د مذاکراتو د راتلونکې ناستې په اړه به طالبان او امريکايي لوری له خپلو مشرانو سره ناستې او مشورې کوي او بيا به بله غونډه کيږي خو ځای او نيټه يې نه ده څرګنده شوې.