تېره اونۍ د اوسپنې پټلۍ له لارې څه باندې ۹۱ زره ټنه انتقالات شوي

د اوسپنې پټلۍ اداره وايي، چې تېره اونۍ د رېل پټلۍ له لارې څه باندې ۹۰ زره متريک ټنه توکي هېواد ته وارد او څه باندې ۱۱۰۰ ټنه توکي له هېواده بهر ته صادر شوي دي. دغې ادارې نن ویلي چې تېره اونۍ د تلې مياشتې له ۱۵ تر ۲۱مې د اوسپنۍ پټلۍ له لارې په ټوله کې ۹۱ زره او ۲۹۵ ميټریک ټنه توکي انتقال شوي دي. سرچینه زیاتوي، د حیرتان رېل پټلۍ له لارې ۷۳ زره او ۱۰۸ ټنه، د اقینې رېل پټلۍ له لارې ۳ زره او ۳۰۰ ټنه او د تـورغونډۍ رېل پټلۍ له لارې ۱۳ زره او ۷۲۸ ټنه توکي هېواد ته وارد شوي او ۱۱۵۹ ټنه توکي بيا له همدغو لارو بهرنیو هېوادونو ته صادر شوي چې لويه برخه یې وچه مېوه ده. د افغانستان د رېل پټلۍ اداره وايي، هڅه کوي د توکو د لا ډېر لېږد رالېږد په موخه سوداګرو ته اسانتیاوې برابرې کړي.