سوداګرۍ خونه: پاکستان ته د افغانستان په صادراتو کې زیاتوالی راغلی

د افغانستان او پاکستان د سوداګرۍ ګډه خونه وايي، سږ کال پاکستان ته د افغانستان صادرات دوه برابره ډېر شوي دي. د دې خونې رییس وایي، که د ډېورنډ فرضي کرښې په اوږو کې ستونزې حل شي، پاکستان ته به د افغانستان د صادراتو کچه لوړه شي. د افغانستان- پاکستان د سوداګرۍ د ګډې خونې رییس نقیب الله صافی وايي د تېر کال په نسبت پاکستان ته د افغانستان صادرات دوه برابره شوي دي او همدارنګه د پاکستان نه هم افغانستان ته صادرات زیات شوي دي. بل‌خوا د سوداګرۍ او پانګونې خونه وایي، له افغانستانه پاکستان ته تر ډېره تازه میوه، سابه، شوکاڼې او د ډبرو سکاره صادرېږي.