ایران: له افغانستان سره اقتصادي اړیکې پراخوو

ايران وايي د افغانستان اقتصادي پر ځان بسياينې ته د خپل مهم لومړيتوب په نظر ګوري او له همدې کبله د افغانستان له سرپرست حکومت سره خپلو اقتصادي اړيکو ته ادامه ورکوي. د ايران د بهرنيو چارو وزارت وياند ناصر کنعاني دا څرګندونې په تهران کې د خپل اونيز خبري کنفرانس پر مهال د لاس انجلېس ټايمز د دې پوښتنې په ځواب کې وکړې چې ايا ايران رښتيا هم افغانستان کې پر کانونو پانګونې ته زړه ښه کړی او که څنګه. کنعاني وويل چې د افغانستان اقتصادي رفاه پر ايران مستقيم اغيز لري او په دې برخه کې مرستې ته لومړيتوب ورکوي. د کنعاني په خبره، چې که افغانستان کې اقتصادي رفاه را منځته شي نو ميليونونو افغانانو ته به د کډوالۍ پر ځای، چې ايران تر اغېزمنيږي، په خپل هېواد کې د کار روزګار فرصتونه برابر شي. د ايران د بهرنيو چارو وزارت وايي چې د افغانستان له سرپرست حکومت سره يې پر اقتصادي اړيکو سربېره په نورو مختلفو برخو کې هم اړيکې دوام لري او په ځينو برخو کې يې توافقات هم کړي دي.