پاکستان کې امنیتي پېښې ۵۱ سلنه زیاتې شوې دي

اسلام آباد کې د سولې مطالعاتو انسټیټیوټ وايي چې په افغانستان کې تېر کال د جمهوري نظام تر سقوط وروسته په پاکستان کې د ترهګرۍ پېښو کې ۵۱ سلنه زیاتوالی راغلی دی. دغه راپور داسې مهال خپرېږي، چې له تېرو شاوخوا دوو مياشتو راهیسې د خیبر پښتونخوا په سوات او نورو سیمو کې يو ځل بيا د پاکستاني ط ا لبانو د فعالېدو راپورونه ورکول کېږي او هلته بيا بيا په زرګونو کسانو د ناامنۍ ضد لوی لوی لاریونونه هم کړي دي. د راپور له مخې، په اسلام آباد کې د پاک سولې مطالعاتي انسټیټیوت په خپل تازه راپور کې ویلي چې د ۲۰۲۱ ز کال د اګست له ۱۵مې بيا د ۲۰۲۲ کال د اګست تر ۱۴مې پورې په پاکستان کې د ترهګرۍ ۲۵۰ پېښو کې ۴۳۳ کسان وژل شوي او تر ۷۰۰ زيات نور ژوبل شوي دي. سرچينې زياته کړې، وړم کال د کابل تر سقوط وړاندې له ۱۵م اگست ۲۰۲۰ بیا تر ۱۴م اگست ۲۰۲۱ پورې د ترهګرۍ ۱۶۵ پېښې شوې وې، چې پکې ۲۹۴ کسان وژل شوي وو. خو د کابل تر سقوط وروسته ۷۵ زياتې پېښې او ۱۴۰ زیات کسان وژل شوي دي.