مک کال: د بايډن اداره افغانستان سره د مرستو پر څارنې خنډونه جوړوي

د امريکا په استازو جرګه کې د جمهوري غوښتونکي ګوند استازي مايکل مک کال د بايډن پر ادارې تور پورې کړی چې له افغانستان سره د امريکا د مرستو د څارنې پر وړاندې خنډونه جوړوي. ده هيل خپرونې په يوه راپور کې ويلي چې مک کال د امريکا د بهرنيو چارو او ماليې وزارتونو او دغه راز د امريکا نړيوالې پراختيايي ادارې ته يو ليک استولی او له سيګار سره د همکارۍ نه کولو له کبله يې پرې توندې نيوکې کړې دي. هغه يادو ادارو ته ويلي چې د افغانستان پر بيارغونې د امريکا له ځانګړي پلټونکي سره د مرستو په څارلو کې همکاري نه کول غير قانوني او د نه منلو وړ عمل دی. مک کال يادو ادارو ته خبرداری ورکړی چې که له سيګار سره همکاري ونه کړي نو کانګريس به يې پر وړاندې ګامونه پورته کړي.