هېواد کې له اداري فساد سره د مبارزې کمېسیون بېرته فعالیږي

له اداري فساد سره د مبارزې له نړۍوالۍ ورځې سره هم مهاله، ا.ا وايي چې راتلونکي کې به له اداري فساد سره د مبارزې کمېسیون فعال کړي. د ا.ا ویاند وايي چې له اداري فساد سره د مبارزې کمېسیون فعالیتونه د اقتصادي ننګونو له امله ځنډول شوي دي. که څه هم د ا.ا ویاند ټینګار کوي چې د سرپرست حکومت بنسټونه له اداري فساده پاک شوي دي خو د کابل ښار یو شمېر اوسېدونکي وايي، سره له دې چې، د تېر نظام په پر تله د اوسني حکومت په ادارو کې اداري او مالي فساد کم شوی، خو په وینا یې دغه ستونزه لا تر اوسه هم په بشپړه توګه نه ده حل شوې. تر دې مخکې په کورنیو چارو وزارت، د استخباراتو په لوی ریاست، سترې محکمې او لویې څارنوالۍ کې د فساد پر وړاندې د مبارزې اړوند پنځه بنسټونه منحل شوي دي. د روڼتیا د نړۍوال سازمان د ارزونو له مخې، افغانستان په ۲۰۲۲ کال کې لا هم د نړۍ په کچه د اوو فاسدو هېوادونو په منځ کې دی.