بلغاریا ته پر لاره یوه لارۍ کې د ۱۸ تنه افغانانو مړي موندل شوي

اروپا ته په قاچاقي لارو روان ۱۸ تنه افغانان د بلغاريا په مربوطاتو کې په یوه لارۍ موټر کې مړه شوي دي. د بلغاریا (بی ان آر) راډیو د ځايي چارواکو په حواله خبر ورکړی چې په لارۍ کې ټول ۴۰ تنه افغان کډوال سپاره وو چې د هغوی له ډلې يې ۱۸ مړه شوي دي. بلخوا د فرانس پرس اژانس د بلغاریا د کورنیو چارو وزارت له قوله لیکلي چې دغه موټر په غيرقانوني ډول شاوخوا ۴۰ کډوال لېږدول چې تر لرګيو لاندې پټ وو. د راپورونو له مخې دا په بلغاريا کې د انسان د قاچاق یوه له خونړیو پیښو څخه شميرل کيږي. د بالکان دغه هیواد د خپلو پولو په اوږدو کې د ناقانونه تګ راتګ له زیاتوالي سره مخامخ دی. تر اوسه ددغو کډوالو د مړه کېدو لامل نه دی په ډاګه شوی. د بلغاريا د روغتیا وزیر اسین میدجیدیف خبریالانو ته ویلي په لارۍ کې ۱۴ کسان ژوندي موندل شوي چې د اتو کسانو روغتیايي حالت خراب و او روغتون ته وړل شوي دي.