دفاع وزارت: په لنډه موده کې به یو بشپړ او پیاوړی پوځ ولرو

د دفاع وزارت لوی درستیز وايي چې په دفاع وزارت کې د هېواد د ځانګړو ځواکونو د روزنې بهیر دوام لري. د سرپرست حکومت دغه امنیتي چارواکی زیاتوي که چېرې  روزنه یې د دوی له وسه پوره نه وه، ځانګړي ځواکونه به د روزنې لپاره نورو هېوادونو ته هم واستول شي. فصیح‌الدین فطرت دغه څرګندونې په خوست ولایت کې له منصوري قول اردو څخه د ۴۵۰ سرتېرو په فراغتغونډه کې کړې دي. ورته مهال د پوځي چارو ځينې کارپوهان د ا.ا په رسمیت نه پېژندنه هغه ستونزه بولي، چې بهر ته یې د نظامي زده کړو لپاره د افغان ځواکونو د لېږلو مخه ډپ کړې ده. د دفاع وزارت چارواکي وایي، چي افغانستان به په لنډه موده کې یو بشپړ او پیاوړی پوځ ولري. د نظامي او امنیتي چارو شنوونکو په اند، افغانستان پر امنیتي ننګونو د بریا لپاره روزل شویو ځواکونو او عصري او پرمختللو پوځي امکاناتو ته اړتیا لري.