پوتزل: پر ښځو بندیزونه به د افغانستان د منزوي کېدو لامل شي

د افغانستان لپاره د ملګرو ملتونو د ځانګړې استازې مرستیال وايي، پر ښځو وروستي بندیزونه به د افغانستان د منزوي کېدو لامل شي. د افغانستان لپاره د ملګرو ملتونو د ځانګړې استازې مرستیال مارکس پوټزل او د افغان ښځو په چارو کې د یاد سازمان استازې ویلي، افغانستان په اسلامي هېوادونو کې یوازینی هېواد دی چې، په کې نجونې او ښځې د زده کړو او کار له حقونو محرومې شوې دي. دی زیاتوي، پر ښځو وروستي محدودیتونه به د افغانستان پر وضعیت منفي اغېز وکړي او په وینا یې د دغه هېواد د منزوي کېدو لامل به هم شي. دی په افغانستان کې د ښځو وضعیت ناسم ګڼي او په دې برخه کې د ګټورو نورو کارونو د ترسره کېدو غوښتونکی دی. له دې سره سم، د افغان ښځو په چارو کې د ملګرو ملتونو استازې په افغانستان کې د سولې او سیاسي ثبات په برخو کې د نجونو او ښځو ونډه مهمه ګڼي او زیاتوي، ملګري ملتونه به د افغان ښځو لپاره د عدالت غوښتنې په موخه له سرپرست حکومت سره خپل تعامل ته دوام ورکړي.