بایډن: د افغان ښځو انساني حقوق تر پښو لاندې کېږي

د امریکا ولسمشر وایي، په افغانستان او ایران کې ښځې له تاوتریخوالي سره مخ دي او انساني حقوق یې تر پښو لاندې کېږي. جو بایډن چې په سپینه ماڼۍ کې یې خبرې کولې، وویل، په افغانستان او ایران کې د ښځو تر څنګ ولاړ دي او په ټوله نړۍ کې به د ښځو له حقونو دفاع وکړي او زیاته کړې یې ده چې په‌دې اړه یې درې مېلیارډ ډالره بودجه هم په پام کې نیولې ده. له بل لوري د امریکا د بهرنیو چارو وزارت مرستیالې وېنډي شېرمن د افغانستان له سرپرست حکومته وغوښتل چې له افغان ولس او نړۍوالې ټولنې سره پر خپلو کړو ژمنو ودرېږي. بل‌خوا د مالیزیا لومړي وزیر انور ابراهیم سعودي عربستان ته د خپل سفر په ترڅ کې په یوې خبري غونډه کې ویلي چې د افغانستان سرپرست حکومت نشي کولی د نجونو د زده کړو حق رد کړي. خو د افغانستان سرپرست حکومت بیا وايي، د ښځو د حقونو مساله د هېواد کورنۍ موضوع ده او په وینا یې نه ښايي نور هېوادونه په دې برخه کې لاسوهنه وکړي.