چينايي شرکتونه افغانستان کې د انرژۍ د تولید برخه کې پانګونه کوي

د اوبو او برېښنا وزارت سرپرست د چینایي شرکتونو د یوې ډلې له مسوولینو سره د ډبرو سکروله سرچینو او لمریزې برېښنا په پروژو کې د انرژۍ د تولید په موخه د پانګه اچونې په هکله بحث او خبرې کړې دي. په دغه کتنه کې، د نوموړو شرکتونو د ګروپ مسوولینو د انرژۍ د تولید په پروژو کې د پانګونې لپاره لېوالتیا ښودلې او په دې برخه کې یې د اوبو او انرژۍ وزارت د مشرتابه د همکارۍ غوښتنه کړې ده. د اوبو او برېښنا وزارت سرپرست په دغه کتنه کې ویلي چې اوسمهال په افغانستان کې له هره اړخه کاري فرصتونه چمتو شوي او د پانګونې لپاره هم ښه زمینه برابره شوې ده. نوموړي ټینګار کړی، چې د پانګونې د چارو د چټکتیا په موخه دې ډېر ژر څو اړخیز هوکړه لیک د دې وزارت، د یادو شرکتونو د ډلې او نورو اړوندو ادارو ترمنځ لاسلیک شي ترڅو د هغه سره سم، په عملي توګه ګډې همکارۍ پیل شي.