وروسته له دې چې طالبانو د سولې خبرو د ځنډولو په اړه امریکا ته خبرداری ورکړ، د سولې په برخه د دغه هېواد استازي سیمې ته خپل سفرونه زیات کړل. له پرله پسې هڅو وروسته زلمی خلیلزاد په دې بریالی شو، چې له طالبانو سره د سولې په ټپه درېدلې خبرې بیا پيل کړي. د افغان سولې په اړه د امریکا د بهرنیو چارو وزارت ځانګړي استازي زلمي خلیلزاد تېره ورځ له پاکستاني چارواکو سره تر لیدنې وروسته قطر ته سفر وکړ. هغه په دوحه کې د طالبانو له استازو سره ولیدل. رسنیو د خپلو سرچینو په حواله راپور ورکړی چې دواړو لورو په دغه لیدنه کې د سولې د راتګ او روانې جګړې د درېدو په اړه بحثونه کړي دي.
تېره ورځ ناوخته وسله والو طالبانو هم د یوې اعلامیې په خپرولو سره د دغه خبرو پخلی کړی دی. د طالبانو ویاند ذبیح الله مجاهد ویلي چې له امریکايي استازي زلمي خلیلزاد سره په دوحه کې د طالبانو د استازو خبرې پيل شوې دي او نن به هم دوام ولري. وسله والو طالبانو د دغه غونډې او خبرو نور جزیات نه دي خپاره کړي؛ خو وایي، وروسته له هغه یې له امریکايي استازو سره خبرو ته زړه ښه کړی چې امریکا له افغانستان د خپلو ځواکونو ایستل د خبرو په اجنډا کې شامل کړل. د اعلامیې په یوه برخه کې راځي «امریکایي اړخ دا ومنله چې په افغانستان کې به د خپل نظامي حضور د پای ته رسولو او د سیمې هېوادونو ته له افغانستانه د ضرر نه رسولو مسئله په اجنډا کې شاملوي، نو له همدې امله موږ د مذاکراتو مېز ته حاضر شوي یو».
وسله والو طالبانو تر دې وړاندې له امریکا سره د خبرو د ځنډولو ګواښ کړی و. دغه ډلې ویلي وو، امریکا هڅه کوي چې د سعودي عربستان او پاکستان له لارې پر طالبانو فشارونه راولي او دغه ډله دې ته اړ کړي چې له افغان حکومت سره مخامخ خبرو ته حاضره شي. وسله والو طالبانو همدا راز ویلي وو چې امریکا له طالبانو سره د خبرو اصلي اجنډا بدله کړې ده، نو که د امریکا دغه ډول کړنې ادامه پیدا کړي، دوی به د سولې خبرې ځنډوي. خو اوس داسې ښکاري چې امریکا له طالبانو سره پر ټاکلې اجنډا خبرې روانې کړې دي.
زلمي خلیلزاد له طالبانو سره تر لیدنې مخکې له پاکستاني، هندي او چینايي چارواکو سره هم لیدنې کتنې کړې دي. خلیلزاد تېره ورځ له پاکستانه د وتلو پر مهال په یوه ټوېټ کې ویلي چې له پاکستاني چارواکو سره یې خبرې ګټورې وې او دوی ژمنه کړې چې د افغان جګړې د پای ته رسولو لپاره به هڅې کوي. له زلمي خلیلزاد سره هممهاله دوو مهمو امریکايي چارواکو هم پاکستان ته سفر کړی و.
تېره ورځ مخکښ او مشهور امریکايي سناتور لیندسي ګراهام او همدا راز لوړپوړي امریکايي جنرال جنرال جوزف ووټل اسلام اباد او راولپنډۍ ته هم سفرونه کړي وو. ووټل ویلي چې پاکستاني چارواکو د سولې په برخه کې د همکارۍ ژمنه ورسره کړې ده. د ده په خبره، په افغانستان کې ثبات او سوله راوستل د امریکا ستره موخه ده، نو پاکستان ته یې هم ویلي چې په دې برخه کې همکاري وکړي. لیندسي ګراهام بیا ویلي چې د افغانستان ثبات د ټولې سیمې لپاره مهم دی، نو له همدې امله به د امریکا له ولسمشر ډونالډ ټرمپ څخه وغواړي چې د افغان جګړې د پای ته رسېدو لپاره د پاکستان او افغانستان له ولسمشرانو سره وګوري. د ده په خبره، دوی باید د جګړې د پای ته رسولو لپاره خپلې ګډې طرحې سره شریکې کړي او په دې توګه په افغانستان کې روانه جګړه پای ته ورسوي.
د طالبانو او امریکا تر منځ د روانو خبرو په اړه افغان حکومت تر دې دمه څه نه دي ویلي، خو د چارو شنونکي دغه اقدام پر ځای بولي او هیله لري چې د امریکا او طالبانو خبرې د افغان حکومت او طالبانو ترمنځ د مخامخ مذاکراتو زمینه برابره کړي.
