اجراییه رییس داووس غونډې ته: طالبانو سره پر ټولو مسایلو خبرې کوو خو امارت نه منو

اجراییه رییس عبدالله عبدالله وایي، که طالبان په رښتیا سوله غواړي د خبرو میز ته دې کېني او د خبرو له لارې دې مسایل مطرح کړي. هغه د سویس په داووس ښار کې د نړیوالۍ اقتصادې مجمعې غونډې ته په خبرو کې ویلي، افغان حکومت په وار وار طالبانو ته له قید او شرط پرته خبرو وړاندیزونه کړي دي خو هغوی نه حاضرېږي. هغه د خپلو خبرو پر دوام وویل افغان حکومت چمتو دی طالبانو سره، له افغانستانه د بهرنیو ځواکونو د وتلو تر څنګ پر ټولو بحث وړ مسایلو خبرې وکړي. نوموړي وویل د افغانانو ژوند په تېرو څو کلونو کې خورا تغییر کړی دی او افغان حکومت به په خپل ټول توان تېرې لاسته راوړنې وساتي. هغه په ټینګار سره وویل طالبانو سره پر ټولو مسایلو بحث کوي خو افغانان به هیڅکله هم اسلامي امارت ونه مني.