ولسمشر غني پرون د سولې په تړاو په خپلو څرګندونو کې ویلي چې د سولې په برخه کې د امریکا د متحده ایالاتو کوښښونه زموږ د سولې د برنامې یوه برخه ده چې مالکیت یې د افغانستان د اسلامي جمهوریت تر چتر لاندې دی. نوموړي دغه راز ادعا کړې چې ګواکي د ځینو هېوادونو په اړه د دوی د انزوا طرحې نتیجه ورکړې او پایله یې اوسنۍ روانې خبرې دي. ولسمشر ویلي: «موږ د ځینو هېوادونو د انزوا او د ځینو هېوادونو د مرستو جلبولو طرحه د تېر کال په حمل کې د امریکا دولت ته وړاندې کړه. د دې طرحې مثبت نتایج موږ نن هره ورځ ګورو».
د ولسمشر له خبرو دوه مسایل ښکاري، لومړی دا چې لا هم د سولې د روانو هڅو په تړاو خلکو ته ناسم معلومات ورکوي او بل دا چې غواړي خلکو ته د سولې په روانو هڅو د کاذبانه تسلط تصویر وړاندې کړي. ټول پوهېږي چې د سولې روانه پروسه د امریکا او طالبانو ترمنځ ده. په دې چاره کې پاکستان هم پوره ښکېل دی او ان سعودي او امارات هم په یوه برخه کې ور ګډ شول، خو لا هم افغانستان پکې نه دی ګډ شوی. د سولې په تړاو ښکاري چې د امریکا او پاکستان معامله هم روانه ده. نو په دې خبرو کې یوازې افغان حکومت منزوي شوی دی. اوس ولسمشر د دې پر ځای چې خلکو ته رښتیا ووايي او ښکاره کړي چې په دغو خبرو کې افغان دولت منزوي شوی دی، هڅه کوي چې خپل کاذبانه تسلط وښيي. کله چې یو څوک د پروسې برخه نه وي او د پروسې د برخې کېدو لپاره یې هڅې بیا بیا ناکامېږي، نو څنګه ادعا کولی شي چې هر څه زموږ تر کنټرول لاندې دي!؟ تر دې خندوونکې او حیرانوونکې خو یې لا دا ده چې ولسمشر د امریکا هڅې هم د خپل پروګرام برخه ګڼي او وايي: «د سولې په برخه کې د امریکا د متحدو ایالاتو کوښښونه زموږ د سولې د برنامې یوه برخه ده». ګواکي خلیلزاد هم د امریکا نه، بلکې د افغان حکومت مامور دی.
ولسمشر بیا د پاکستان په اړه ناسم تصویر وړاندې کوي، وايي چې ګواکي امریکا د پاکستان د منزوي کېدو په اړه د افغان دولت طرحه عملي کوي. د دې مانا دا ده چې د افغانستان حکومت تر امریکا پیاوړی دی او ښه طرحه جوړولی شي. امریکا خپله طرحه نه لري او د افغانستان د حکومت طرحه عملي کوي. خو ولسمشر په خپلو سترګو کې خاورې شیندي او هېروي چې پاکستان د معاملې برخه دی او امتیاز اخلي. همدا اوس یې په دې تړاو درې میلیارده ډالره له اماراتو، شپږ میلیارده له سعودي او ان له امریکا هم پیسې ترلاسه کوي. که دېته انزوا ویل کېږي، دا نو بیا پکار ده چې په قاموسونو کې د انزوا مانا بدله شي.
ولسمشر ته پکار ده چې د ناسمو او هوايي خبرو پر ځای ولس ته رښتیني معلومات ورکړي، څو د سترو زیانونو مخه ونیول شي. رښتیا دا دي چې د سولې پروسه د حکومت له کنټرول څخه بهر ده، امریکا یا ونه غوښتل او یا یې ونه شو کولی چې طالبان له حکومت سره خبرو ته کېنوي. رښتیا دا دي چې د پاکستان او امریکا ترمنځ معامله روانه ده. رښتیا دا دي چې د سولې په پروسه کې تر نورو ټولو اړخونو افغان حکومت منزوي او بې خبره دی. که ولسمشر خلکو ته رښتیني معلومات ورکړي، نو خلک بیا حالت بدلولی شي، د ناوړه معاملو مخه نیولی شي او د سولې هڅې رښتیني مسیر ته برابرولی شي.
