افغان حکومت: اړتیا ته په کتو به د ټاپي پروژې لپاره ځانګړی ځواک جوړ شي

د ریاست الوزرا اقتصادي معاونيت وايي، په افغانستان کې د ټاپي پروژې عملي چارو پیلېدو ته بشپړ چمتووالی شته او که اړتیا ولیدل شي د امنیتي چارو لپاره به يي ځانګړی ځواک جوړ شي. ټاپي د ترکمنستان افغانستان پاکستان او هند ترمنځ د ګازو نل لیکې غځولو پروژه ده چې د ۲۰۱۵ کال په مې میاشت کې یې د کار پیلېدا عملي اړخ تړون د اړوندو هېوادونو ولسمشرانو ترمنځ د ترکمنستان په عشق آباد کې لاسلیک شو. د ریاست الوزرا اقتصادي معاونیت نن د ټاپي او نورو ملي پروژو د امنیتي چارو د ډاډ په اړه خبرپاڼه خپره کړې ده. سرچینې لیکلي، ټاپي چې د سيمې په کچه یوه مهمه اقتصادي پروژه ده او د پیل نوښت یې هم د ا.ا د لومړۍ واکمنۍ پرمهال شوی خو بشپړول یې پر افغانستان د امریکايي اشغال له امله تر اوسه ځنډېدلی دی. سرچینه زیاتوي، ا.ا په هېواد کې د ملي پروژو امنیت ته خورا پام کوي او په هېواد کې د ټاپي پروژې د عملي چارو پيلېدو لپاره بشپړ چمتووالی لري، دې پروژې ته د هېواد د اقتصادي زېربنا د يوه مهم عنصر په توګه ګوري او د عملي چارو پيل يې د افغانانو لپاره یو ښه زېرى بولي.